سىبايلاس جەمقورلىققا قارسى ءىس-قيمىل اگەنتتىگى توراعاسى اليك شپەكباەۆتىڭ حالىقارالىق باسقارۋشىلىق دامۋ ينستيتۋتىنىڭ (IMD) وپەراتسيالىق ءبولىمى باسشىسى حريستوس كابوليس جانە شۆەيتساريالىق لوزاننادا ورنالاسقان باسەكەگە قابىلەتتىلىكتى زەرتتەۋ ورتالىعىنىڭ ساراپشىسى ماركو پيستيسپەن ونلاين-كەزدەسۋى ءوتتى, دەپ حابارلايدى Egemen.kz.
پرەزەنتاتسيالىق ماتەريالدارمەن تانىسقان حريستوس كابوليس قازاقستاننىڭ سىبايلاس جەمقورلىققا قارسى ساياساتىنىڭ ىسكە اسىرىلۋىن جوعارى باعالاپ, «ساياسي جاڭعىرتۋ پريزماسى ارقىلى ونى جەتىلدىرۋدىڭ دايەكتى جانە ويلاستىرىلعان سيپاتىن, سونداي-اق الدىن الۋ-پروفيلاكتيكالىق, تاربيەلىك-ءبىلىم بەرۋ جانە قىلمىستىق-قۇقىقتىق قۇرالداردى قولدانۋداعى كەشەندى ءتاسىلدى» ەرەكشە اتاپ ءوتتى.
جاھاندىق كوروناۆيرۋستىق داعدارىس كەزىندە سىبايلاس جەمقورلىقتى بولدىرماۋ جانە الدىن الۋ شارالارى ساراپشىلاردىڭ ۇلكەن قىزىعۋشىلىعىن تۋدىردى. ساراپشىلار: «جازانىڭ بۇلتارتپاستىعى, مەديتسينالىق مەكەمەلەردىڭ, ءدارىحانالار مەن قويمالاردىڭ مونيتورينگىنە ازاماتتىق قوعامدى كەڭىنەن تارتۋ, گۋمانيتارلىق كومەكتى سۇيەمەلدەۋ, ەڭ باستىسى, وسى پروتسەستىڭ اشىقتىعى مەن ايقىندىلىعى مەملەكەتتىك اپپاراتتىڭ, بيزنەس-قوعامداستىقتىڭ جانە قازاقستان جۇرتشىلىعىنىڭ وسىنداي كۇردەلى كەزەڭدەگى جۇمىسىنىڭ جۇيەلىلىگى مەن شوعىرلاندىرىلعانىن كورسەتەدى», - دەپ اتاپ كورسەتتى.
ماركو پيستيس ءولىم جازاسىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتى حاتتامانى راتيفيكاتسيالاۋ تۋرالى اقپاراتتى ۇلكەن ىقىلاسپەن قابىلدادى. ساراپشى, سونداي-اق, سىبايلاس جەمقورلىق فاكتىلەرى تۋرالى حابارلاعان ازاماتتاردى كوتەرمەلەۋدىڭ سارالانعان جۇيەسىن ۋاقتىلى ەنگىزۋگە جانە ۇزدىك حالىقارالىق تاجىريبە نەگىزىندە اقپاراتتاندىرۋشىلاردى قورعاۋدىڭ كەشەندى جۇيەسىن (whistleblowers) جوسپارلى ەنگىزۋگە نازار اۋداردى.
اليك شپەكباەۆ شەتەلدىك ساراپشىلاردىڭ سۇراقتارىنا جاۋاپ بەرە وتىرىپ, داعدارىسقا قارسى شارالار كەشەنى تۋرالى ەگجەي-تەگجەيلى باياندادى. «ەل باسشىلىعىنىڭ ساياسي ەرىك-جىگەرىنىڭ ارقاسىندا قازاقستاندا 700 مىڭ كاسىپكەر ءۇشىن سالىق جەڭىلدىكتەرى, زارداپ شەككەن سالالار قارىز الۋشىلارىنىڭ 80% ءۇشىن نەسيەلەرىن كەيىنگە قالدىرۋ, دامۋ باعدارلامالارى اياسىندا 40 مىڭ جوبانى قارجىلاندىرۋ تۇرىندە ەكونوميكانى قولداۋدىڭ بۇرىن سوڭدى بولماعان شارالارى قابىلداندى», - دەپ اتاپ ءوتتى اگەنتتىك توراعاسى.
بۇدان باسقا, اگەنتتىك باسشىسى سۇحباتتاسۋشىلاردى «ادالدىق الاڭى», «Protecting business and investments» سىبايلاس جەمقورلىققا قارسى جوبالارىنىڭ, «اشىق بيۋدجەت» پەن اشىق بيۋدجەت ينتەراكتيۆتى كارتاسىنىڭ ناتيجەلەرىمەن, سونداي-اق, ورتالىق ازيا وڭىرىندەگى ءوزارا ءىس-قيمىل اياسىنداعى ءىس-شارالارمەن تانىستىردى.
كەزدەسۋ سوڭىندا تاراپتار سىندارلى ىنتىماقتاستىقتى, اسىرەسە تسيفرلىق سىبايلاس جەمقورلىققا قارسى شەشىمدەر بويىنشا IMD تاراپىنان ادىستەمەلىك قولداۋ جانە كەڭەس بەرۋ بولىگىندە جالعاستىرۋ تۋرالى ۋاعدالاستى.