ەلوردالىق الاياق جاڭاوزەن تۇرعىنىنان جۇمىسقا تۇرعىزۋ ءۇشىن 4 ملن تەڭگە اقشا العان, دەپ حابارلايدى ەgemen.kz
جاقىندا جاڭاوزەن قالاسى پوليتسيا باسقارماسىنىڭ كەزەكشى بولىمىنە جەرگىلىكتى تۇرعىن ارىزبەن جۇگىنەدى.
ونىڭ ايتۋىنشا, باسقا قالادان كەلگەن ەر ادام ونى جۇمىسقا ورنالاستىرۋعا ۋادە بەرىپ, كومەگى ءۇشىن ودان الدىن الا 4 ملن تەڭگە اقشا العان. الايدا ۋادە ەتىلگەن جۇمىسقا ورنالاستىرۋ تۋرالى ماسەلە شەشىلمەگەندىكتەن, قالا تۇرعىنى الدانعانىن ۇعىپ, پوليتسياعا شاعىمدانعان.
جەدەل ۋاكىلدەر وسى ىسكە قاتىسى بار دەگەن كۇدىكپەن نۇر-سۇلتان قالاسىنىڭ 41 جاستاعى تۇرعىنىن انىقتاپ, اتالعان ازامات پوليتسياعا جەتكىزىلدى.
قازىر تىركەلگەن فاكت بويىنشا قر قك-ءنىڭ 190-بابى 3-بولىگىنىڭ 1-تارماعى (الاياقتىق) بويىنشا سوتقا دەيىنگى تەرگەۋ باستالدى.
ايدا ورالبەك