قازاقستاننىڭ پرەمەر-ءمينيسترى اسقار مامين ەۋروپالىق وداقپەن, وڭتۇستىك-شىعىس ازيا ەلدەرى قاۋىمداستىعىمەن ديالوگ قۇرۋ ءۇشىن جۇيەلى جۇمىس جۇرگىزۋ قاجەتتىلىگى تۋرالى ايتتى, دەپ حابارلايدى Egemen.kz.
– سىرتقى سۇرانىستىڭ شەكتەۋلى ديناميكاسى جانە ساتۋ نارىقتارى ءۇشىن باسەكەلەستىكتىڭ ارتۋى جاعدايىندا ءۇشىنشى ەلدەرمەن جانە ينتەگراتسيالىق بىرلەستىكتەرمەن ساۋدا-ەكونوميكالىق قاتىناستاردى كەڭەيتۋ بويىنشا جۇمىستى كۇشەيتۋ قاجەت, – دەدى مامين ەۋرازيالىق ۇكىمەتارالىق كەڭەستىڭ كەڭەيتىلگەن وتىرىسىندا.
مامين ەۋروپالىق وداقپەن, وڭتۇستىك-شىعىس ازيا حالىقتارى قاۋىمداستىعىمەن جان-جاقتى ايماقتىق ەكونوميكالىق سەرىكتەستىك تۋرالى ديالوگ قۇرۋ بويىنشا جۇيەلى جۇمىستار جۇرگىزۋ قاجەت ەكەنىن باسا ايتتى.
قازاقستان پرەمەر-ءمينيسترى مۇنداي بايلانىستاردى ورناتۋ ەاەو تاۋارلارى مەن قىزمەتتەرىنىڭ سىرتقى نارىقتارعا شىعۋىنا جاعداي جاسايدى جانە ەكونوميكالاردىڭ حالىقارالىق وندىرىستىك قۇندىلىقتار تىزبەگىنە ينتەگراتسيالانۋىن كۇشەيتەدى دەگەن پىكىرىن ءبىلدىردى.
كەزدەسۋ قورىتىندىسى بويىنشا وتكەن ءباسپاسوز كونفەرەنتسياسىندا قر پرەمەر-ءمينيسترى ەۋرازيالىق ەكونوميكالىق كوميسسيا قازاقستاندىق باستامالاردى ىسكە اسىرۋ جونىندەگى ءىس-شارالار جوسپارىن بەكىتتى, وندا 15 نەگىزگى مىندەت پەن 84 ءىس-شارا انىقتالدى دەپ مالىمدەدى. بيىلعى جىلى 57 ءىس-شارا (2022-2025 - 27 ءىس-شارا) جۇزەگە اسىرىلادى دەپ جوسپارلانۋدا.
بۇعان دەيىن مامين ەۋرازيالىق ەكونوميكالىق وداققا مۇشە ەلدەر جاڭا ساۋدا كەدەرگىلەرىنىڭ پايدا بولۋىنا جول بەرمەۋى جانە بۇرىننان بار جاعدايلاردى جويۋ بويىنشا جۇمىستى كۇشەيتۋى كەرەك دەپ اتاپ ءوتتى.
ەسكە سالايىق, 5 اقپاندا قازاقستاننىڭ وڭتۇستىك مەگاپوليسىندە تسيفرلىق الماتى فورۋمى, سونداي-اق ەاەو ۇكىمەتارالىق كەڭەسىنىڭ وتىرىسى ءوتتى. وعان وداق ەلدەرىنىڭ ۇكىمەت باسشىلارى, ەەك مينيسترلەرى, سونداي-اق ەاەو باقىلاۋشى ەلدەرى - مولدوۆا, وزبەكستان جانە كۋبا قاتىسىپ جاتىر.
ايتا كەتۋ كەرەك, ەۋرازيالىق ۇكىمەتارالىق كەڭەستىڭ وتىرىسى قاتاڭ سانيتارلىق نورمالاردى ساقتاي وتىرىپ ءوتىپ جاتىر.