بۇگىن ولار قازاقستاننىڭ وڭتۇستىك استاناسىنا كەلە باستايدى. ۇكىمەت باسشىلارىنىڭ كەزدەسۋى دارىگەرلەردىڭ باقىلاۋىمەن وتەدى, دەپ جازادى Egemen.kz.
ەسكە سالا كەتسەك, 5 اقپان, جۇما كۇنى الماتىدا ەۋرازيالىق ەكونوميكالىق وداققا مۇشە ەلدەردىڭ ۇكىمەت باسشىلارىن ءبىر شاڭىراق استىندا جينايتىن جيىن وتەدى. بۇل پاندەميا باستالعاننان بەرى ەاەو ەلدەرى ۇكىمەت مۇشەلەرى باس قوساتىن العاشقى حالىقارالىق شارا.
ەۋرازيالىق ۇكىمەتارالىق كەڭەستىڭ وتىرىسىنا قازاقستان, رەسەي, ارمەنيا, بەلارۋسسيا جانە قىرعىزستان ۇكىمەت باسشىلارى قاتىسادى دەپ كۇتىلۋدە. ولار سونداي-اق «تسيفرلىق الماتى» فورۋمىنا قاتىسادى.
الداعى كەزدەسۋ كەزىندە جۋرناليستەر ءبىر تىلدەسىپ قالۋدى ارمانداپ وتىرعان تۇلعا قىرعىزستاننىڭ - ءبىرىنشى ۆيتسە-پرەمەر – 34 جاستاعى ارتەم نوۆيكوۆ.
ايتپاقشى, جاڭا ۆيتسە-پرەمەر تۋرالى قىرعىز اعايىنداردىڭ پىكىرى وڭ. قىرعىز جۋرناليستەرى ا. نوۆيكوۆتىڭ قىرعىز ءتىلىن جاقسى مەڭگەرگەنىن جازىپ جاتىر. كەيبىر رەسمي ءىس-شارالاردا ونىڭ مەملەكەتتىك تىلدە سويلەيتىنىن كەشەلى بەرى ءبىز دە بايقاپ قالدىق.
بۇگىن كەشتەتىپ الماتىعا جەتەتىن تاعى ءبىر قۇرمەتتى قوناق – بەلارۋسسيا ۇكىمەتىنىڭ باسشىسى رومان گولوۆچەنكو. ول رەسپۋبليكا تاريحىنداعى ونىنشى پرەمەر مينيستر.
گولوۆچەنكو - حالىقارالىق قاتىناستار ماماندىعى بويىنشا ماسكەۋ مەملەكەتتىك حالىقارالىق قاتىناستار ينستيتۋتىن (مگيمو) بىتىرگەن, اعىلشىن, اراب, نەمىس جانە پولياك تىلدەرىن بىلەدى.
دەلەگاتسيا اسشىلارىنىڭ الماتىعا كەلۋى كۇندىز 4 اقپانعا جوسپارلانعان. قر ءسىم-ءنىڭ رەسمي وكىلى ايبەك سمادياروۆ ۇكىمەتارالىق كەڭەسكە دايىندىق ءجۇرىپ جاتىر, بارلىق ۇيىمداستىرۋشىلىق ماسەلەلەر شەشىلگەنىن, ەۋرازيالىق ينتەگراتسيا اياسىنداعى ەكونوميكالىق ىنتىماقتاستىقتىڭ ەڭ وزەكتى ماسەلەلەرى كۇن تارتىبىندە تۇرعانىن ايتتى.
دەنساۋلىق ساقتاۋ مينيسترلىگى ەۋرازيالىق ۇكىمەتارالىق كەڭەستىڭ وتىرىسى قاتاڭ سانيتارلىق نورمالار ساقتالا وتىرىپ وتكىزىلەتىنىن ايتتى.
قازاقستانعا كەلەتىن دەلەگاتسيا مۇشەلەرىنە قويىلاتىن ورتاق تالاپ – ماسكا رەجيمى مەن الەۋمەتتىك ديستانتسيانى ساقتاۋى كەرەك.