ەسترادا جۇلدىزدارى مەن تەلەجۇرگىزۋشىلەر حالىقتى وبىرعا تەگىن تەكسەرىلۋگە شاقىردى

قازاقستاندىق ونكولوگتاردىڭ اكتسياسىن روزا رىمباەۆا, تولقىن زابيروۆا, بايان ماقساتقىزى, جەڭىس ىسقاقوۆا, رۇستەم جانە الينۋر نۇرجىگىت, ايگۇل مۇكەي, ساعىناي ابدۋلين, ايبەك جانسەيىتوۆ (بۇركىت), ەلەنا يساەۆا, ايدا كاۋمەنوۆا, جاننا ورىنباساروۆا, ايگۇل باباەۆا, اشا ماتاي, نۇربەرگەن ماحامبەتوۆ جانە ايساۋلە باقىتبەك قولدادى.

ەڭ كوپ تارالعان قاتەرلى ىسىك تۇرلەرىن ەرتە انىقتاۋعا ارنالعان ونكوسكرينينگتەردى تۇرعىلىقتى جەرى بويىنشا (تىركەلگەن جەرى بويىنشا) ەمحانالاردان وتۋگە بولادى.

1) ءسۇت بەزى قاتەرلى ىسىگىنىڭ سكرينينگى. 40 جاستان 70 جاسقا دەيىنگى ايەلدەر. 2 جىلدا 1 رەت.2) جاتىر موينى قاتەرلى ىسىگىنىڭ سكرينينگى 30 جاستان 70 جاسقا دەيىنگى ايەلدەر. 4 جىلدا 1 رەت.3) كولورەكتالدى قاتەرلى ىسىك سكرينينگى (توق جانە تىك ىشەكتىڭ قاتەرلى ىسىگى). 50 جاستان 70 جاسقا دەيىنگى ەرلەر مەن ايەلدەر. 2 جىلدا 1 رەت.

ونكوسكرينينگ كەز كەلگەن ۋاقىتتا قول جەتىمدى جانە اقىسىز! ەسىڭىزدە بولسىن, ەرتە انىقتالعان دياگنوز ءومىردى ساقتايدى.

جىل سايىن 4 اقپاندا حالىقارالىق وبىرعا قارسى وداقتىڭ (UICC) باستاماسى بويىنشا دۇنيەجۇزىلىك وبىرعا قارسى كۇرەس كۇنى اتاپ وتىلەدى. قازاقستاندا جىل سايىن 36 مىڭعا جۋىق جاڭا قاتەرلى ىسىك اۋرۋى تىركەلەدى. بۇگىنگى تاڭدا ديسپانسەرلىك ەسەپتە 180 مىڭنان استام ونكولوگيالىق ناۋقاستار تۇر. جىل سايىن ونكولوگيالىق اۋرۋلاردان 14 مىڭ ادام قايتىس بولادى.

قازاقستاندا ەڭ كوپ تارالعان قاتەرلى ىسىك تۇرلەرى: ءسۇت بەزى قاتەرلى ىسىگى, وكپە قاتەرلى ىسىگى, اسقازان قاتەرلى ىسىگى, جاتىر موينى قاتەرلى ىسىگى جانە كولورەكتالدى قاتەرلى ىسىك. قازاقستاندىقتار ءۇشىن ونكولوگيالىق اۋرۋلاردى دياگنوستيكالاۋ مەن ەمدەۋ تەگىن مەديتسينالىق كومەكتىڭ كەپىلدىك بەرىلگەن كولەمىنە كىرەدى جانە ونى مەملەكەت تولىق قارجىلاندىرادى.