اماندىق باتالوۆ قۇرىلىس نىساندارىن ارالادى

الدىمەن جابىق ءجۇزۋ باسسەينىنە بارعان وبلىس باسشىسى نىساننىڭ ىشكى ارلەۋ جۇمىستارى مەن سىرتقى اباتتاندىرۋ, كوركەيتۋ ءىسىنىڭ ەگجەي-تەگجەيىنە ءمان بەرىپ, نازار اۋداردى. سەبەبى تەڭدەسسىز نىساندا ۇساق-تۇيەك دەگەن بولمايدى.

جوبالىق قۇنى 11,4 ملرد تەڭگە بولاتىن جابىق ءجۇزۋ باسسەينى قۇرىلىسىنىڭ ءى كەزەڭىندە مەملەكەتتىك-جەكەمەنشىك ارىپتەستىك بويىنشا عيماراتتىڭ ءىشى تولىقتاي سالىنىپ بىتكەن, قازىر ارلەۋ جۇمىستارى ءجۇرىپ جاتىر. جاقىندا باسسەينگە سۋ تولتىرىلىپ, تەكسەرۋدەن وتكىزىلەدى. ءىى كەزەڭى وتكەن جىلدىڭ قاراشاسىندا باستالىپ, جۇمىسشىلار سىرتقى اباتتاندىرۋ ىسىنە كىرىسكەن. قازىر وبەكتىدە 300-دەي جۇمىسشى ەڭبەك ەتۋدە.

وبلىس اكىمى الدىمەن عيماراتتىڭ ءىشىن ارالاپ كوردى. نىسان قۇرىلىسىن جۇرگىزگەن «اۆس كوركەم قۇرىلىس» جشس ديرەكتورى مۋستافا افرايلوۆقا زالدارداعى تەمىر تىرەك باعانداردى اق تۇسپەن بوياۋدى, سول سياقتى مەتالل كونسترۋكتسيالار توبەدەن كوزگە قوراش كورىنبەيتىندەي ەتىپ, ەستەتيكالىق تالعامعا سايكەس كەلتىرۋدى تاپسىردى. ەسىك جاقتاۋلارىندا, پلينتۋستا, قابىرعا مەن مەتالل كونسترۋكتسيالارىنىڭ جالعاسقان تۇستارىندا ەلەۋسىز ساڭىلاۋلاردىڭ ءوزى بولماۋى كەرەكتىگىن ەسكەرتتى. باسسەينگە بيىكتەن سەكىرۋگە ارنالعان باسپالداقتار دا اق شاتىرداي بولىپ الىستان كوز تارتىپ, كوركەم كورىنۋى ءتيىس. ول ءۇشىن ولاردى دا اق تۇسپەن بوياۋ كەرەك. باسپالداقتاردىڭ استىنداعى بولتتار دا باسى ارتىق زاتتاي سىرتقا شىعىپ تۇرماۋى ءتيىس. وسى ارالاۋ بارىسىندا اماندىق باتالوۆ جارىسقا ارنالعان ۇلكەن باسسەين الاڭىندا قاي تۇستان قاتىسۋشىلاردىڭ تۋلارى كوتەرىلەدى, قاي جەردەن جەڭىمپازداردىڭ تۋى جەلبىرەيدى, جارىستىڭ ماراپاتتاۋ ءراسىمى قاي جەردە وتەدى – بارلىعىنىڭ ورىندارىن بەلگىلەپ, ارلەۋ, قۇرىلعىلار ورناتۋ جۇمىستارىن سوعان سايكەس جۇرگىزۋدى تاپسىردى. سول سياقتى قابىلداۋ بولمەسىنىڭ ماڭدايشا جازۋىنىڭ, عيمارات ىشىندەگى جاليۋزدەردىڭ تۇستەرى قانداي بولاتىنى دا ايقىندالدى.  

مۇنان سوڭ وبلىس اكىمى سىرتتاعى اباتتاندىرۋ جۇمىستارىنا نازار اۋداردى. قازىر بۇل جۇمىستارعا 60 ادام تارتىلعان. تالدىقورعان قالاسى اكىمدىگى مەن وبلىستىق ساۋلەت جانە قالا قۇرىلىسى باسقارماسىنا جانە باسقا دا ءتيىستى ورگاندارعا نىساننىڭ اينالاسىن كوگالداندىرۋ, باسسەين ماڭايىنىڭ ارحيتەكتۋرالىق شەشىمى قادىرعالي جالايري داڭعىلىمەن جانە بالاپانوۆ كوشەسىمەن, سول سياقتى قاتار جاتقان «جاستار» ساياباعىمەن ۇيلەسىمدى تۇردە جالعاسۋى كەرەك ەكەنىن ايتتى. اباتتاندىرۋ بارىسىندا پايدالانىلاتىن شاعىن ساۋلەتتىك فورمالاردىڭ, جارىق شامدارىنىڭ, ورىندىقتاردىڭ, گۇلزارلاردىڭ ۇلگىلەرىنىڭ جوبالارىن جاقىن كۇندەردە كورسەتۋدى تاپسىردى.

نىسان ماڭىنداعى اعاشتاردى كەسپەي, ولاردى ساقتاپ, رەتكە كەلتىرىپ, كوك جەلەك وتىرعىزۋدان كەشىگىپ قالماۋدى قاتاڭ ەسكەرتتى.

مۇنان سوڭ وبلىس اكىمى اماندىق باتالوۆ قالاداعى تۇرعىن ۇيلەر سالىنىپ جاتقان الاپقا باردى. الدىمەن بۇعان دەيىن «بايتەرەك» ۇبح» اق باستاماسىمەن ىرگەسى قالانىپ باستالعان تۇرعىن ۇيلەردىڭ اياقسىز تۇرعان قۇرىلىسىن وبلىس اكىمدىگى قارجى ءبولىپ, قۇرىلىس جۇمىستارىن قايتا جانداندىرعان بولاتىن. 6 جانە 7-ءشى شاعىن اۋدانداردا بوي كوتەرگەن جالپى سانى 110 پاتەرلىك بۇل قوس ءۇيدى سالۋمەن «تسا نيپي ترانسنەفت» جشس  مەردىگەر مەكەمەسى اينالىسۋدا. بۇل جەردە اماندىق باتالوۆ كوپ پاتەرلى تۇرعىن ءۇيدىڭ ءبىرىنشى قاباتىنان قوسارلانىپ تۇرعىزىلىپ جاتقان كەڭسەلىك عيماراتقا نازار اۋداردى. بۇل نىساننىڭ قۇرىلىس سىزىعىنان اسىپ, قۇرىلىس نورمالارىن ساقتاماي سالىنىپ جاتقانىنا نارازىلىق ءبىلدىردى. عيماراتتىڭ سالىنۋ بارىسىن باقىلاماعان, قۇرىلىس يەسىنە زاڭ تالاپتارىن تۇسىندىرمەگەن قالالىق اكىمدىكتىڭ, وبلىستىق ساۋلەت جانە قالا قۇرىلىسى باسقارماسىنىڭ بوساڭ جۇمىسىن سىنعا الدى. ءتيىستى نورمالار ساقتالماي سالىنىپ جاتقان قۇرىلىستى توقتاتۋدى تاپسىردى.

سول سياقتى اماندىق باتالوۆ «بىرلىك» شاعىن اۋدانىندا باس مەردىگەر كومپانيا «وتباسى قۇرىلىس گرۋپپ» جشس سالىپ جاتقان كوپقاباتتى ۇيلەردىڭ دە سالىنۋ بارىسىن كوردى. مۇندا 75, 60 جانە 40 پاتەرلىك ءۇش تۇرعىن ءۇي بوي كوتەرۋدە, قۇرىلىس جۇمىستارى اياقتالۋعا جاقىن. اتالعان سەرىكتەستىك ديرەكتورى ازيز ەسىمحانوۆ وبلىس اكىمىنە تۇرعىن ۇيلەر قۇرىلىسىنىڭ جۇرگىزىلۋ بارىسى جايلى باياندادى. بۇل باسپانالاردىڭ بارلىعى دا حالىققا «باقىتتى وتباسى», «شاڭىراق», «7-20-25», «5-10-20» مەملەكەتتىك باعدارلامالارى بويىنشا بەرىلمەك.

اماندىق عابباس ۇلى تۇرعىن ۇيلەردىڭ ەڭ الدىمەن ساپالى بولۋى كەرەكتىگىن ايتتى. اسىرەسە, جاڭادان بوي كوتەرەتىن شاعىن اۋداندا سالىنىپ جاتقان ۇيلەردىڭ بىرىڭعاي ساۋلەتتىك كەلبەتى, بىركەلكى فاسادتىق شەشىمى بولۋى كەرەكتىگىن تاپسىردى. 

«تالدىقورعان – وبلىس ورتالىعى. سوندىقتان تالدىقورعاننىڭ كوركەم كەلبەتىنە قالا اكىمدىگىمەن بىرگە قۇرىلىسقا جەتەكشىلىك ەتەتىن ورىنباسارلارىم دا جاۋاپتى. جابىق ءجۇزۋ باسسەينى قۇرىلىسىنداعى ەسكەرتۋ جاسالعان تۇستارىنىڭ تولىقتاي قالپىنا كەلتىرىلۋىن قاداعالاڭدار. ول – وليمپيادالىق ستاندارتتارعا ساي جاسالۋعا ءتيىس تەڭدەسسىز نىسان. ونىڭ قۇرىلىس جۇمىستارى تولىق اياقتالعانشا تاعى دا بىرنەشە رەت بارىپ, كورەمىن. ال تۇرعىن ۇيلەردىڭ قارقىنىن باسەڭدەتپەي, ساپالى سالۋدى تاپسىرامىن», دەدى ا.باتالوۆ.