قىزىلوردا وبلىسىندا مادەنيەت سالاسى بويىنشا 2020-2021 جىلدارعا ارنالعان «جۇمىسپەن قامتۋدىڭ جول كارتاسى» اياسىندا 22 جوبا ىسكە اسىرىلدى. بۇل تۋرالى كوممۋنيكاتسيالىق قىزمەت ورتالىعىندا وتكەن بريفينگتە وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى ميرا ءابۋوۆا حابارلادى.
مادەنيەت سالاسى وكىلدەرىنىڭ تىلشىلەرمەن كەزدەسۋىندە وبلىستىق فيلارمونيا جانىنان سالىنعان قوسىمشا عيمارات جايلى دا ايتىلدى.
- جاڭا عيماراتتا دايىندىق زالى, تىگىن تسەحى, اسحانا جانە كيىم قويماسى ورنالاسقان. كەڭ, ەڭ باستىسى جارىق, ارتىستەردىڭ شىعارماشىلىقپەن اينالىسۋىنا قولايلى. بيىل كارانتيندىك تالاپتاردى ساقتاي وتىرا جاڭا ماۋسىم 11 قاڭتاردا باستالدى,- دەدى وبلىستىق فيلارمونيا ديرەكتورى تالعات ماقاشوۆ.
جىل باسىنان بەرى فيلارمونيا 10 شارا وتكىزىپ, وعان 700-دەن اسا كورەرمەن قاتىستى. بۇعان قوسا, گاسترولدىك ساپارلار جايلى وزگە كونتسەرتتىك ۇيىمدارمەن شىعارماشىلىق كەلىسىم جاساۋدا.
ال وتكەن جىلى ۇيىمداستىرىلعان 178 شارانىڭ باسىم بولىگى پاندەمياعا بايلانىستى ونلاين فورماتتا بولدى. وبلىستا تۇڭعىش رەت اباي قۇنانباي ۇلىنىڭ 175 جىلدىق مەرەيتويىنا وراي «اباي» وپەراسى ساحنالاندى. بىلتىرعى جىلعى تاعى ءبىر جاڭالىق – فيلارمونيا جانىنان قوبىزشىلار ءانسامبلى قۇرىلدى. كلاسسيكالىق ورىنداۋشى سىمبات تاسبەرگەنوۆا كسرو حالىق ءارتيسى ن.تىلەنديەۆتىڭ 95 جىلدىعىنا ارنالعان «القيسسا» فەستيۆالىنەن, «اقمەشىت» فولكلورلىق ءانسامبلىنىڭ مۇشەسى, دومبىراشى الماس ءالجانوۆ م.سىدىقوۆتىڭ 80 جاسقا تولۋىنا ارنالعان «دومبىرا-جۇرەك جىرلايدى» اتتى رەسپۋبليكالىق ونلاين-كۇيشىلەر كونكۋرسىنان جۇلدەلى ورىنداردى يەلەندى.