بۇگىن «قوشقار اتا» قالدىق قويماسىن قالپىنا كەلتىرۋ پروتسەسىن جانداندىرۋ تۋرالى ماسەلەگە نۇكتە قويىلدى. جۇمىستار الدىمىزداعى 1-2 ايدا باستالادى دەپ كۇتىلۋدە. بۇل تۋرالى ەكولوگيا ءمينيسترى ماعزۇم مىرزاعاليەۆتىڭ ماڭعىستاۋ وبلىسىنا جاساعان ساپارى كەزىندە ايتىلدى, دەپ حابارلايدى Egemen.kz.
ماڭعىستاۋ وبلىسى اكىمىنىڭ ورىنباسارى باقىتجان قاشاقوۆ پەن ماڭعىستاۋ وبلىسى تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى دۇيسەن قۇسبەكوۆ ءمينيستردى قالپىنا كەلتىرۋ بويىنشا جۇمىس جوسپارىمەن تانىستىردى. مينيستر راديواكتيۆتى ءارى ۋلى كول ماسەلەسىن شەشۋدى كەشىكتىرمەۋ كەرەك ەكەنىن جانە پروتسەستى جاقىن ارادا باستاۋ قاجەتتىگىن ايتتى. سەبەبى, «قوشقار اتا» جاقىن ماڭداعى ەلدىمەكەندەر تۇرعىندارى ءۇشىن ايتارلىقتاي زيان كەلتىرەدى.
مامانداردىڭ ايتۋىنشا, قالپىنا كەلتىرۋ پروتسەسى شامامەن 3 جىلعا سوزىلادى. بۇگىنگى كۇنى «قوشقار اتا» قالدىق قويماسىنىڭ اينالاسىندا جاسىل قورعانىش ايماعىن قۇرۋ بويىنشا جۇمىس جۇرگىزىلۋدە. 2015 جىلدان 2020 جىلعا دەيىن 239 مىڭعا جۋىق سەكسەۋىل كوشەتتەرى وتىرعىزىلدى. بۇل جۇمىستار ۋلى كولدىڭ جاعالاۋى جاسىل جەلەكتەرمەن تولىق قورشالعانعا دەيىن جالعاسپاق. قوسىمشا تاعى 40 گا كوشەت وتىرعىزۋعا كونكۋرس جاريالاندى.
ەستەرىڭىزگە سالا كەتسەك, قالپىنا كەلتىرۋ جۇمىستارىن جۇرگىزۋگە كونكۋرس 2019 جىلدىڭ جەلتوقسان ايىندا جاريالانعان بولاتىن. سول كەزدە مەملەكەتتىك ساتىپ الۋ بويىنشا كونكۋرستى وتكىزۋدىڭ زاڭدىلىعىنا قاتىستى ماسەلە تۋىندادى. سوت پروتسەسىنەن كەيىن جوعارعى سوت القاسىنىڭ قاۋلىسىمەن بەرىلگەن كاسساتسيالىق شاعىمدار قاناعاتتاندىرىلدى. ەندى بۇل جۇمىستاردى اتقارۋعا «پاۆلودارسكي رەچنوي پورت» اق جۇمىسقا كىرىسەدى. «قوشقار اتا» قالدىق قويماسى كاسپي تەڭىزىنەن 7-8 شاقىرىم جانە اقتاۋدان 3-4 شاقىرىم قاشىقتىقتا ورنالاسقان. جالپى اۋدانى 77 كم2, قالدىقتاردىڭ اۋدانى 66 كم2 قۇرايدى.