قازاقستانعا ەكستراكورپورالدى ۇرىقتاندىرۋ (ەكو) پروتسەدۋراسى ءۇشىن زەينەتاقى جيناعىن قولدانۋعا رۇقسات بەرىلەدى. بۇل تۋرالى «وتباسى بانكىنىڭ» باسقارما توراعاسى ءلاززات يبراگيموۆا ايتتى, دەپ حابارلايدى Egemen.kz
«ەندى زەينەتاقى جيناعىن الۋعا قاتىستى ەرەجەدە سەگىزىنشى ماقسات قوسىلدى, ول «كومەكشى رەپرودۋكتيۆتى ادىستەر مەن تەحنولوگيالار» دەپ اتالادى. مۇنىڭ ىشىنە ەكستراكورپورالدى ۇرىقتاندىرۋ پروتسەدۋراسى دا كىرەدى», دەيدى ءلاززات يبراگيموۆا الەۋمەتتىك جەلى ارقىلى وتكەن تىكەلەي ەفير بارىسىندا.
ونىڭ ايتۋىنشا, زەينەتاقى جيناعىن قولدانۋ ەرەجەلەرىن دەنساۋلىق ساقتاۋ مينيسترلىگى كەلەسى اپتادا جاريالايدى.
«كەلەسى اپتادا بۇل ەرەجەلەر زاڭدى كۇشىنە ەنەدى دەپ كۇتىپ وتىرمىز. ءسابيلى بولۋعا قاتىستى ماسەلەلەرى بار وتباسىلار زەينەتاقى جيناعى ەسەبىنەن ەكو جاساۋ مۇمكىندىگىنە يە بولادى», دەيدى ول.
ەسكە سالساق, قر پرەزيدەنتى قاسىم-جومارت توقاەۆ قازاقستان حالقىنا جولداۋىندا 2021 جىلدان ەلىمىزدە «اڭساعان ءسابي» ارناۋلى باعدارلاماسى ىسكە قوسىلاتىنىن ايتتى. 2021 جىلى 2 قاڭتاردا قر پرەزيدەنتى قاسىم-جومارت توقاەۆ زەينەتاقى جيناعىنىڭ ءبىر بولىگىن ماقساتتى پايدالانۋعا قاتىستى زاڭعا قول قويدى. قازاقستاندىقتاردىڭ زەينەتاقى جيناقتارىن پايدالانۋ ءۇشىن جاڭارتىلعان «جەتكىلىكتىلىك شەگى» جاريالاندى.
زەينەتاقى جيناعىنان الۋعا بولاتىن سوما بجزق سايتىندا اۆتوماتتى تۇردە كورسەتىلەدى. 23 قاڭتاردان قازاقستاندا زەينەتاقىنىڭ ءبىر بولىگىن الۋعا ءوتىنىم قابىلداۋ باستالدى. ارنايى پورتالدا زەينەتاقىنىڭ ءبىر بولىگىن الۋعا ءوتىنىم قابىلداۋ باستالعالى ءۇش ساعاتتىڭ ىشىندە 4 مىڭنان استام ادام ءوتىنىش بەردى. زەينەتاقى قارجىسىن ەمدەلۋ ءۇشىن الۋ ەرەجەلەرى وسى ايدىڭ سوڭىندا جاريالانادى.