نۇر-سۇلتان قالاسى اكىمىنىڭ ورىنباسارى ەرمەك قيزاتوۆ قوعامدىق كەڭەس مۇشەلەرىمەن وتكەن كەزدەسۋدە ەلوردانىڭ قوعامدىق كولىگىنىڭ جۇمىسى تۋرالى ءتۇسىندىرىپ بەردى, دەپ حابارلايدى Egemen.kz
قازىرگى ۋاقىتتا قوعامدىق كولىك جۇمىسىن 6 اۆتوبۋس پاركى ۇيىمداستىرادى, سولاردىڭ ءبىرى – كوممۋنالدىق, قالعانى – جەكەمەنشىك. قالا بويىنشا 91 مارشرۋت جۇرەدى: 66 قالالىق, 24 قالا ماڭىنداعى جانە 1 ساياجاي. كۇن سايىن جەلىگە 800-دەن استام اۆتوبۋس شىعادى, سونىڭ 739-ى قالالىق مارشرۋتتارعا قىزمەت كورسەتەدى.
«وتكەن جىلى ءبىز قالانىڭ باعىت-باعدار جەلىسىن جاڭارتتىق, ويتكەنى ەلوردا كۇن ساناپ ءوسىپ, ۇلكەيىپ جاتىر. 4 جاڭا مارشرۋت ىسكە قوسىلدى, 16 مارشرۋت وڭتايلاندىرىلدى. قالاداعى پروبلەمالى ۋچاسكەلەرگە قولجەتىمدىلىكتى قامتاماسىز ەتتىك. ەسكىلەرىن جاڭارتتىق. بيىل تاعى 8 جاڭا قالالىق مارشرۋتتى ىسكە قوسۋدى جوسپارلاپ وتىرمىز. بۇدان باسقا, ادام كوپ جۇرەتىن ۋچاسكەلەرگە 3 قىسقا مارشرۋت قوسۋدى جوسپارلاپ وتىرمىز», دەدى ە.قيزاتوۆ.
ەستەرىڭىزگە سالا كەتەيىك, وتكەن جىلى 100 ەلەكتر اۆتوبۋسى ساتىپ الىنىپ, جەلىگە شىعارىلعان بولاتىن. ولار ەكولوگياعا زيانسىز جانە اتموسفەراعا ەشقانداي قالدىق شىعارمايدى. سونداي-اق جەلىگە تاعى 100 وسىنداي اۆتوبۋس شىعارۋ جوسپاردا بار.