قوسشى اۋىلىندا ورنالاسقان قارجى پوليتسياسى اكادەمياسىندا ناۋرىز مەيرامى ەرەكشە ءبىر كۇيدە مەرەكەلەنىپ ءوتتى. ولاي دەيتىنىمىز, اتالعان وقۋ ورنى ەلىمىزدەگى سىبايلاس جەمقورلارمەن ىمىراسىز كۇرەس جۇرگىزەتىن ناعىز قايسار, قايتپاس, الىنباس قارجى پوليتسياسى ماماندارىن دايىنداپ شىعارادى. ال ناۋرىز مەيرامى قاشاندا بىلىكتىلىك پەن بىرلىككە, سابىرلىلىق پەن ءتوزىمدىلىككە جانە ونەرلى بولا ءبىلۋگە شاقىرادى. مىنە, وسى ورايدا قاۋىپتى كەسەلمەن كۇرەس جۇرگىزەتىن بولاشاق ماماندار تەك زاڭدى ءبىلىپ, قۋدالاۋدى يگەرۋى عانا ەمەس, ولاردىڭ جان-جاقتى قالىپتاسىپ, بار ونەردى بويلارىنا جيۋى ءادىلدىكتىڭ اق جولىنان تايماۋىنا اسەرىن تيگىزەدى.
سىبايلاس جەمقورلىقپەن كۇرەس تەرەڭنەن باستاۋ الۋى كەرەك. بۇل ورايدا مەملەكەت باسشىسىنىڭ تىكەلەي باستاماسىمەن ەلىمىزدە جەمقورلىققا كەڭ كولەمدى سوققى بەرىلىپ كەلەدى. سونىڭ ارقاسىندا سىبايلاستىق سىرقاتى ءبىراز ءباسەندەپ قالدى. بىراق, باستالعان بەرەكەلى ءىس ورتا جولدا توقتاپ قالماس ءۇشىن ونىڭ قۋاتى كۇننەن كۇنگە ارتا تۇسكەنى ءجون. ول ءۇشىن قاۋىپتى كەسەلگە قارسى تۇرا بىلەتىن جانە ونىمەن ىمىراسىز كۇرەس جۇرگىزە الاتىن ماماندار قاجەت. ەلىمىزدە سىبايلاس جەمقورلىقپەن تىكەلەي كۇرەس جۇرگىزەتىن وزگە دە قۇقىق قورعاۋ ورگاندارىمەن قاتار ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى ەكەنى بەلگىلى. ال ونىڭ قۋاتىنا قۋات قوسىپ, كۇش بەرىپ وتىراتىن قارجى پوليتسياسى اكادەمياسى.
مىنە, جىل سايىن وسى اتالعان وقۋ ورنىنا جۇزدەن اسا تىڭداۋشى قابىلدانادى. ماسەلەن, بىلتىر 1-كۋرسقا 120 تىڭداۋشى الىندى. ولاردىڭ ءبارى جالپى ءبىلىم بەرۋ مەكتەپتەرىندەگى بىرىڭعاي ۇلتتىق سىناقتاردى جاقسىعا تاپسىرىپ, اكادەميانىڭ مەديتسينالىق, پسيحولوگيالىق تەكسەرۋىنەن جانە دەنە شىنىقتىرۋ دايىندىعىنان ءوتىپ, سوڭعى ءۇش دەڭگەيلى كەشەندى كونكۋرستىق ىرىكتەۋدە الدىنا جان سالماعان ورىمدەي جاستار. ولار وسى بىرنەشە ساتىدان مۇدىرمەي وتكەن سوڭ اكادەمياعا قابىلدانىپ, “جاس جاۋىنگەرلەر كۋرسى” مەن ماماندىق پاندەرىن وقىپ, اسكەري ساپتىق دايىندىقتى يگەردى. قازىر ءتورت كۋرس تىڭداۋشىلارىنىڭ اراسىندا بىلىكتىلىك, تاپقىرلىق جانە جان-جاقتى ءتالىم-تاربيەلىك تۇرعىسىنان ءوزارا باسەكەلەستىك جارىسى باستالىپ كەتكەندەي. سونىڭ ءبىر كورىنىسى, ءار كۋرس تىڭداۋشىلارىنىڭ ناۋرىز مەيرامىن اتا-بابا سالت-داستۇرىنە سايكەستەندىرىپ, لايىقتى دايىندالۋىنان-اق بايقالىپ تۇردى.
وقۋ الاڭىندا اق شاڭقاي بىرنەشە كيىز ءۇي تىگىلىپتى. جوعارىدا ايتقانىمىزداي, اتالعان وقۋ ورنىندا ءتورت كۋرس بار. سوعان سايكەس كۋرس تىڭداۋشىلارى ءتورت كيىز ءۇيدى ناۋرىز مەيرامىنا دايىنداۋدى ءوز جاۋاپكەرشىلىكتەرىنە العان. جينالعان جۇرت ءار كيىز ۇيگە باس سۇعىپ تىڭداۋشىلاردىڭ ونەرلەرى مەن ەرەكشە ءبىر تاپقىرلىقتارىنا باعا بەرەتىندىگى ءسوزسىز. مىنە, وسى ورايدا ءبىر-بىرىمەن ءباسەكەگە تۇسكەن ءتورت كۋرستىڭ تىڭداۋشىلارى ونەرلەرىن ورتاعا سالدى. ءار كيىز ءۇيدىڭ سىرتقى بەزەندىرىلۋىنىڭ ءوزى بىردەن كوز تارتىپ, ونىڭ الدىندا ۇلتتىق كيىمدى توگىلدىرە كيگەن بىرنەشە جاس جىگىتتەر مەن مىڭ بۇرالا بيلەپ جۇرگەن ارۋلاردىڭ قيمىلى ءتانتى ەتەدى. قىز ۇزاتۋ مەن كەلىن ءتۇسىرۋ كورىنىستەرى ادەمى شىقتى. اسىرەسە, ادالدىق پەن ادىلدىك جولىندا باسەكەگە تۇسكەن تىڭداۋشىلار ونەرى كورەرمەندى رازى قىلدى.
الەكساندر تاسبولاتوۆ.