پاتەرىندە جوندەۋ جۇمىستارىن جۇرگىزىپ كورگەن ادامنىڭ قابىرعاعا جاسىرىلعان سىمداردى ابايسىزدا زاقىمداپ العان كەزدەرى بولادى. ءسىز بۇرعىلاپ جاتقان كەزدە, كەنەتتەن جارىق ءسونىپ قالدى: دەمەك, ءسىز سىمدى ءۇزىپ الدىڭىز. كەز كەلگەن وپەراتسيا كەزىندە دە ءدال وسىنداي جاعدايلار ورىن الۋى مۇمكىن, ويتكەنى بارلىق جەردە جاسىرىن جۇيكە ورنالاسادى, بۇلار وڭاي زاقىمدالادى. الايدا, قۇلاققا جاسالاتىن وپەراتسيالار كەزىندە بۇل اسا قاۋىپتى. ويتكەنى بەتتەگى نەرۆتەردىڭ زاقىمدانۋى – وپەراتسيادان كەيىنگى ءجيى كەزدەسەتىن اسقىنۋلاردىڭ ءبىرى: ءار ادامنىڭ جۇيكە تالشىقتارى ءارتۇرلى جەرلەردە ورنالاسادى, سوندىقتان نەرۆتى الدىن الا بولجاۋ جانە تابۋ قيىن.
وكىنىشكە قاراي, ەگەر ۇزىلگەن سىمدى جالعاۋعا نەمەسە اۋىستىرۋعا بولاتىن بولسا, نەرۆتەر زاقىمدالعان كەزدە, جاعداي قيىنعا سوعادى.
«ورتاڭعى قۇلاقتا تەز زاقىمداناتىن بەت نەرۆتەرى ورنالاسادى. ەستۋ قابىلەتىن جاقسارتۋعا ارنالعان وپەراتسيالار جانە سوزىلمالى وتيت كەزىندەگى وپەراتسيالار ءدال وسى ورتاڭعى قۇلاقتا جاسالادى. بەت نەرۆىسىنىڭ زاقىمدانۋى سال اۋرۋىنا اكەلۋى مۇمكىن. بۇل دەگەنىمىز – پاتسيەنتتىڭ بەت-الپەتى قيسايىپ كەتەدى: ول كۇلۋدەن, كوزىن جىپىلىقتاتۋدان جانە ءدام سەزۋدەن قالادى. بەتتىڭ جارتىسى سال بولىپ قالادى. بۇل ءومىر ساپاسىنا قاتتى اسەر ەتەدى, پسيحولوگيالىق تۇرعىدان دا قيىن», دەيدى پرەزيدەنتتىك كلينيكانىڭ دارىگەر-وتورينولارينگولوگى اينۇر نەسىپباەۆا.
البەتتە, سول نەرۆتى تاۋىپ الىپ, وپەراتسيا كەزىندە ونى «اينالىپ» وتپەسكە نەگە بولمايدى دەگەن ساۋال تۋى مۇمكىن. بۇگىنگى تاڭدا مۇنداي ءادىس تابىلعان جانە ونى «ينتراوپەراتسيالىق نەيروفيزيولوگيالىق باقىلاۋ» نەمەسە قىسقاشا نەيرومونيتورينگ دەپ اتايدى.
پرەزيدەنتتىك كلينيكانىڭ نەيروفيزيولوگى ولگا اگەەۆانىڭ ايتۋىنشا, قازىر نەيرومونيتورينگسىز ەشقانداي وپەراتسيا وتپەيدى. سەبەبى بۇل ءادىس وپەراتسيا كەزىندە قاۋىپتى «اۋىتقۋلاردى» كورسەتىپ وتىرادى. «قاراپايىم سوزبەن ايتقاندا, وپەراتسيا كەزىندە نەيروفيزيولوگ نەرۆ پەن بۇلشىقەتتىڭ بەلسەندىلىگىن ەسەپتەپ, حيرۋرگتارعا ەرەكشە بەلگىلەر پايدا بولعان كەزدە سيگنال بەرىپ تۇرادى. سيگنالدار حيرۋرگتاردىڭ نەرۆكە جاقىن ەكەنىن بىلدىرەدى: ولار ول تۇستى اينالىپ ءوتىپ, باسقا, ايتارلىقتاي قاۋىپسىز ءتاسىلدى تابۋعا تىرىسادى», دەيدى و.اگەەۆا.
«ارينە, وپەراتسيا كەزىندە ەگەر نەرۆتى كورىپ تۇرساق, ونى اينالىپ وتەمىز. ال ەگەر وزدىگىمىزدەن تابا الماساق, وندا نەيرومونيتورينگتى قولدانامىز. بۇل ءادىس – دەتەكتور سياقتى. ول بىزگە قۇددى ءبىر «مينا الاڭىنان وتۋگە» جانە نەرۆتى زاقىمداپ الماۋعا مۇمكىندىك بەرەدى», دەيدى اينۇر احمەتقاليقىزى.
بەت نەرۆتەرىنىڭ پاراليچىنەن قورقۋ قالىپتى جاعداي ەكەنىن ەستە ساقتاعان ءجون. الايدا, بۇل قورقىنىش ناۋقاستى قاجەتتى ەم الۋدان باس تارتقىزباۋى كەرەك. قۇلاقپەن بايلانىستى اۋرۋلار وتە قاۋىپتى: بۇل ەستۋ قابىلەتىنىڭ جوعالۋىنا, مەنينگيتكە, ميدىڭ ابستسەسىنە جانە ولىمگە اكەلۋى مۇمكىن. سونداي-اق, نەيرومونيتورينگ لور وپەراتسيالارىنان باسقا دا وپەراتسيالاردا قولدانىلادى: «مونيتورينگتىڭ بۇل ءادىسى نەيروحيرۋرگيا, ج ۇلىن حيرۋرگياسى, تراۆماتولوگيا, جاق-بەت جانە ەندوكريندىك حيرۋرگيادا قولدانىلادى», دەپ تولىقتىرادى ولگا ۆلاديميروۆنا.