شىعىس قازاقستان وبلىسىندا الدىن الا بەلگىلى ءبىر ورىندارعا سالىپ قويۋ ارقىلى سينتەتيكالىق ەسىرتكى تاراتۋمەن اينالىساتىن جاس قىز انىقتالدى, – دەپ حابارلايدى Polisia.kz.
11 قاڭتاردا ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى وبلىس ورتالىعىندا “سكوروست” جانە “مەفەدرون” پسيحوتروپتىق زاتتارىن تاراتۋمەن اينالىسقان 21 جاستاعى قىزدى ۇستادى. بويجەتكەن وڭاي ولجاعا كەنەلۋ ماقساتىندا وسكەمەن قالاسىنىڭ اۋماعىندا پسيحوتروپتىق زاتتاردى بايلانىسسىز تاسىلمەن, ياعني الدىن الا بەلگىلى ءبىر ورىندارعا قويىپ كەتۋ ارقىلى ساتۋدى جانە اقىسىن قولما-قول اقشاسىز الۋدى ۇيىمداستىرۋدى شەشكەن.
– ۇستاۋ بارىسىندا كۇدىكتىنىڭ پاتەرىنەن 650 رەت قولدانۋ دوزاسىنا تەڭ 200 گرامنان استام پسيحوتروپتىق زاتتار الىندى, ونىڭ قارا نارىقتاعى باعاسى 2 ملن. تەڭگەدەن ارتىق سومانى قۇرايدى, سونداي-اق ەسىرتكى دوزالارىن وراۋعا جانە ولشەۋگە ارنالعان قۇرالدار تاركىلەندى, – دەدى شقو پد باستىعى ساعات ماديەۆ.اتالعان فاكت بويىنشا قر قك-ءنىڭ 297-بابىنىڭ 3-بولىگى (ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ, ولاردى جونەلتۋ نە وتكىزۋ) بويىنشا سوتقا دەيىنگى تەرگەۋ باستالدى. اتالعان قىلمىستى جاساعانى ءۇشىن 10 جىلدان 15 جىلعا دەيىن باس بوستاندىعىنان ايىرۋ جازاسى كوزدەلگەن.