سوڭعى مالىمەتتەر بويىنشا, ەلوردادا شاعىن جانە ورتا بيزنەستىڭ 33 585 سۋبەكتىسى بار. ونىڭ ىشىندە 59,9%-ى ءوز دەرەكتەرىن اقپاراتتىق جۇيەدە جاڭارتقان, ال 40,1%-ى مۇنى ءالى جاساعان جوق, دەپ حابارلايدى Egemen.kz
«الەۋمەتتىك مەديتسينالىق ساقتاندىرۋ قورى 2021 جىلدىڭ 25 قاڭتارىنا دەيىن شاعىن جانە ورتا بيزنەس كاسىپكەرلەرى جەڭىلدىكتى ساناتتارىنا جاتاتىن ءوز قىزمەتكەرلەرىنىڭ دەرەكتەرىن (جسن) msb.fms.kz سىلتەمەسى بويىنشا «Saqtandyry» اقپاراتتىق جۇيەسىنە ەنگىزىپ, جاڭارتىپ وتىرۋى ءتيىس ەكەنىن ەسكە سالادى. ۋاقتىلى ەنگىزىلمەگەن جاعدايدا قىزمەتكەرلەر ساقتاندىرۋ مارتەبەسىنىڭ بولماۋىنا بايلانىستى ءمامس جۇيەسىندە مەديتسينالىق كومەككە جۇگىنە المايدى. بۇل ءىس-شارانى شاعىن جانە ورتا بيزنەس وكىلدەرى تۇراقتى تۇردە ەسەپتى ايدان كەيىنگى ايدىڭ 25-نە دەيىن جۇرگىزۋى كەرەك», دەيدى «الەۋمەتتىك مەديتسينالىق ساقتاندىرۋ قورى» كەاق نۇر-سۇلتان قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ.
ەستەرىڭىزگە سالا كەتەيىك, 2020 جىلعى قاراشادا قازاقستان رەسپۋبليكاسى ۇكىمەتىنىڭ 2020 جىلعى 30 قازانداعى №721 قاۋلىسى شىقتى, قۇجاتقا سايكەس جەكە پراكتيكامەن اينالىساتىن ادامدار, سونداي-اق ميكرو, شاعىن نەمەسە ورتا كاسىپكەرلىك سۋبەكتىلەرى 2021 جىلعى 1 قاڭتارعا دەيىن جالدامالى قىزمەتكەرلەر ءۇشىن اۋدارىمداردى تولەۋدەن بوساتىلعان بولاتىن.
پاندەميا كەزىندە «نولدىك مولشەرلەمەنى» قولدانعان شوب تىزىمىنە ساۋدا, كولىك جانە تەحنيكالىق قىزمەت كورسەتۋ, ءبىلىم بەرۋ, مەديتسينا, تۋريزم, مەيرامحانا-قوناق ءۇي ءىسى, ويىن-ساۋىق سالاسى, باعدارلامالىق قامتاماسىز ەتۋ, فيتنەس جانە ت.ب. سۋبەكتىلەر كىردى.