2020 جىلى سوت ورىنداۋشىلاردىڭ ماجبۇرلەپ ورىنداۋىندا 5 ملن استام اتقارۋشىلىق قۇجات بولدى. بۇل تۋرالى قر ادىلەت ۆيتسە-ءمينيسترى المات ماداليەۆ ايتتى, دەپ حابارلايدى Egemen.kz
«2020 جىلى سوت ورىنداۋشىلاردىڭ ماجبۇرلەپ ورىنداۋىندا 5 ملن استام اتقارۋشىلىق قۇجات بولدى. ياعني, ءوندىرىپ الۋشىلاردىڭ پايداسىنا 7 ترلن تەڭگە سوماسىنان ارتاتىن اتقارۋشىلىق ءىس جۇرگىزۋلەر قوزعالدى. اتقارۋشىلىق ءىس قۇجاتتاردىڭ ورىندالۋى 69,9 پايىزدى قۇرادى. وسىلايشا, مينيسترلىكتىڭ ستراتەگيالىق جوسپارىنىڭ نىسانالى ينديكاتورلارىنا قول جەتكىزۋى قامتاماسىز ەتىلدى», دەدى ول مينيسترلىكتىڭ كەڭەيتىلگەن القا وتىرىسىندا.
ونىڭ ايتۋىنشا, وتكەن جىلدىڭ كوكتەم كەزىندە «Covid-19» كوروناۆيرۋستىق ينفەكتسياعا قاتىستى ەنگىزىلگەن توتەنشە رەجيمگە قاراماستان اتقارۋشىلىق ءىس جۇرگىزۋ باعىتى بويىنشا جۇمىس اقاۋسىز قامتاماسىز ەتىلدى. توتەنشە جاعداي كەزىندە سوت ورىنداۋشىلارعا ينفەكتسيانىڭ تارالۋىن بولدىرماۋ ماقساتىندا اتقارۋشىلىق ءىس جۇرگىزۋ تاراپتارىمەن قاتىناسۋدى ازايتىپ, ۇيدەن شىعارۋعا, قۇرىلىستاردى بۇزۋعا قاتىستى پروتسەسسۋالدىق ارەكەتتەردى كەيىنگە قالدىرۋعا تاپسىرما بەرىلدى.
«وسىنداي شەكتەۋگە قاراماستان الەۋمەتتىك ماڭىزدى اتقارۋشىلىق قۇجاتتاردىڭ ورىندالۋى باسىمدىقتا قالا بەردى. ولاردىڭ ورىندالۋى اتقارۋشىلىق ءىس جۇرگىزۋ ورگاندارىنىڭ اۆتوماتتاندىرىلعان اقپاراتتىق جۇيەسى ارقىلى اتقارۋشىلىق ءىس-ارەكەتتەردى قاشىقتىق رەجيمىندە قامتاماسىز ەتىلدى», دەدى المات ماداليەۆ.