سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتى وتكەن جىلى 97 قىلمىستى انىقتاعان. ونىڭ 72-ءسى سىبايلاس جەمقورلىق قىلمىسى, دەپ حابارلايدى Egemen.kz
وبلىستا ەڭ كوپ ورىن العان سىبايلاس جەمقورلىق قىلمىستارى ءبىلىم بەرۋ سالاسىندا – 24, جەر قاتىناستارى سالاسىندا – 13, تۇرعىن ءۇي, كوممۋنالدىق شارۋاشىلىق – 9 الەۋمەتتىك قورعاۋ جانە دەنساۋلىق ساقتاۋ سالالارىندا – 5, ال قۇرىلىس سالاسىندا انىقتالعانى – 4.
دەپارتامەنت باسشىسى حاكيم كوشقاليەۆتىڭ قاتىسۋىمەن وتكەن جىل قورىتىندىسى بويىنشا ەسەپ بەرۋ بريفينگىندە وسىنداي دەرەكتەر كەلتىرىلدى. سونداي-اق دەپارتامەنتتىڭ شتاب باسشىسى جومارت ايتوۆ شاعىن جانە ورتا كاسىپكەرلىك بيزنەسىنە مەملەكەتتىك ورگانداردىڭ لاۋازىمدى تۇلعالارىمەن زاڭسىز ارالاسۋدىڭ 18 دەرەگى انىقتالعانىن, 15 كاسىپكەردىڭ قۇقىعى مەن بوستاندىعى قورعالىپ, اتالعان قىلمىستار بويىنشا جەرگىلىكتى اتقارۋشى ورگاندارىنىڭ 10 لاۋازىمدى تۇلعاسى سوت ۇكىمىمەن سوتتى بولعانىن ءمالىم ەتتى. وندىرىستەگى قىلمىستىق ىستەر بويىنشا جالپى 1 ملرد 345 ملن تەڭگە زالال انىقتالىپ, ونىڭ 1 ملرد 335 ملن تەڭگەسى, ياعني 99%-ى وندىرىلگەن. وتكەن جىلى 10 مەكەمەنىڭ قىزمەتىندە سىرتقى تالداۋ جانە 12 سىبايلاس جەمقورلىققا قارسى مونيتورينگ جۇرگىزىلگەن. مەملەكەتتىك مەكەمەلەردىڭ ساتىپ الۋ مونيتورينگى ناتيجەسىندە 2 ملرد تەڭگەدەن استام قارجى ۇنەمدەلگەن.
«وبلىس بويىنشا سىبايلاس جەمقورلىقتىڭ الدىن-الۋ باعىتىندا 850 مىڭعا جۋىق ادامدى قامتىعان 1817 ءتۇرلى باعىتتا ءىس-شارالار وتكىزىلدى. ال دەپارتامەنتتىڭ ونلاين فورماتتا وتكەن "Antikor Live" جوباسى اياسىندا – 375, "Adal Komek" جوباسىمەن – 776, اقپاراتتىق اعارتۋشىلىق شتابىمەن 295 تىكەلەي ەفير ۇيىمداستىرىلىپ, جالپى 700 مىڭنان اسا قارالىم جينالدى», دەدى جومارت ايتوۆ.
دەپارتامەنتتىڭ ۇسىنىسىمەن وبلىسقا قاراستى بارلىق اكىمدىكتەر "سەرۆيستىك ۇلگىگە" تولىقتاي كوشكەن جانە تۇرعىنداردىڭ يگىلىگى ءۇشىن اشىلعان «سەرۆيستىك اكىمدىكتەر» بىلتىر مەملەكەتتىك قىزمەتتىڭ 65 686 ءتۇرىن كورسەتكەن. بيىل كولەمى جاعىنان ۇلكەن اۋىلدىق وكرۋگتەردە حالىققا قولايلى قىزمەت كورسەتۋ ءۇشىن «سەرۆيستىك اكىمدىكتەر» اشۋ جوسپارلانىپ وتىر. سونداي-اق مەملەكەتتىك قىزمەتتىڭ اشىقتىعىن, قولجەتىمدىلىگىن كوزدەيتىن الاڭ قۇرۋ ماقساتىندا وبلىستىق اكىمدىكتىڭ باسقارمالار ۇيىنەن «اشىق اكىمدىك» اشىلعان.
جومارت ايتوۆ وبلىس تۇرعىندارىنا بارىنشا قولايلى جاعداي جاساۋ ماقساتىندا «پاراساتتىلىق ورتالىعىنىڭ» اشىلۋى – مەملەكەت پەن ازاماتتاردىڭ ءوزارا ارەكەتتەسۋىنىڭ جاڭا فورماتىن ايقىندايتىنىن اتاپ ءوتتى.