اتىراۋدا كامەلەتتىك جاسقا تولماسا دا ىشىمدىك ىشەتىن جاسوسپىرىمدەر ۇستالىپ جاتىر.
وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, وتكەن جىلى تۇنگى ساعات 23:00-دەن كوشە كەزەتىن 1500-گە جۋىق ءجاسوسپىرىم انىقتالىپتى. بالالارىنىڭ قايدا جۇرگەنىنە بەيحابار اتا-انالارى اكىمشىلىك جاۋاپكەرشىلىككە تارتىلدى.
«پوليتسيا قىزمەتكەرلەرى بيىلعى جىل باسىنان بەرى قوعامدىق ورىندا ىشىمدىك ءىشىپ جۇرگەن 20-عا جۋىق ءجاسوسپىرىمدى انىقتادى. سونىڭ ءبىرى – قىزىلقوعا اۋدانىنان كەلگەن 17 جاسار بوزبالا. ول تۇنگى ساعات 23:30 شاماسىندا «يساتاي-ماحامبەت» الاڭىندا اتا-اناسىز جۇرگەن. تەكسەرۋ كەزىندە ونىڭ ماساڭ كۇيدە جۇرگەنى بەلگىلى بولدى. ول دوستارىمەن بىرگە سىرا ىشكەنىن مويىندادى» -دەپ حابارلادى دەپارتامەنتتىڭ ءباسپاسوز قىزمەتى.
الىس اۋداندا تۇراتىن اتا-اناسى ۇلىنىڭ سىرا ءىشىپ, ماس بولىپ جۇرگەنىنەن حابارسىز ەكەن. دەگەنمەن ونىڭ اتا-اناسى شاقىرتىلىپ, ولارعا قاتىستى قر اكىمشىلىك قۇقىقبۇزۋشىلىق تۋرالى كودەكسىنىڭ 442-بابىنىڭ 2-بولىگىمەن ەسكەرتۋ بەرىلدى. سونداي-اق اتالعان كودەكستىڭ 440-بابىنىڭ 2-بولىگىمەن 5 ايلىق ەسەپتىك كورسەتكىش كولەمىندە ايىپپۇل سالىندى.