قازاقستان پرەزيدەنتى پارلامەنت ءماجىلىسىنىڭ جالپى وتىرىسىنا قاتىستى. قاسىم-جومارت توقاەۆ پارلامەنت ءماجىلىسىنىڭ جالپى وتىرىسىنىڭ الدىندا فراكتسيالاردىڭ جەتەكشىلەرىمەن كەزدەستى.
قازاقستان پرەزيدەنتى كونستيتۋتسيادا بەكىتىلگەن تارتىپكە سايكەس پرەمەر-ءمينيستردىڭ لاۋازىمىنا ۇسىنىلاتىن كانديداتۋرانى دەپۋتاتتىق فراكتسيا جەتەكشىلەرىمەن اقىلداستى.
مەملەكەت باسشىسى پارلامەنت ءماجىلىسىنىڭ وتىرىسىندا ەلىمىزدىڭ الەۋمەتتىك-ەكونوميكالىق دامۋىن قورىتىندىلاپ, اتقارۋشى بيلىك تارماعىنىڭ پاندەميا سالدارىنان بولعان جاھاندىق داعدارىس جاعدايىنداعى ءىس-ارەكەتىنە باعا بەردى.
– ۇكىمەت داعدارىسقا قارسى جوسپاردى ءتيىمدى جۇزەگە اسىردى. سونىڭ ارقاسىندا جۇمىسسىزدىقتىڭ كوبەيۋىنە, حالىق تابىسىنىڭ جاپپاي تومەندەۋىنە جول بەرىلگەن جوق. بۇل شارالار ءتيىمدى بولدى, – دەدى قاسىم-جومارت توقاەۆ.
سونىمەن قاتار مەملەكەت باسشىسى ەلىمىزدەگى نەگىزگى ماكروەكونوميكالىق كورسەتكىشتەردىڭ تۇراقتى جانە قارجى جۇيەسىنىڭ ورنىقتى ەكەنىن اتاپ ءوتتى.
قازاقستان پرەزيدەنتى ۇكىمەت پەن ءماجىلىستىڭ جاڭا قۇرامى ەكونوميكانىڭ ۇزاق مەرزىمدى ءوسىمىن قامتاماسىز ەتۋگە جانە حالىقتىڭ ءال-اۋقاتىن جاقسارتۋعا باسا كوڭىل ءبولۋى ءتيىس ەكەنىن ايتتى.
قاسىم-جومارت توقاەۆ جاڭا ۇكىمەتتىڭ ءتيىمدى جانە ۇزدىكسىز جۇمىس ىستەۋىن قامتاماسىز ەتۋ ماقساتىندا ەل كونستيتۋتسياسىنىڭ 44-بابىنا سايكەس, قازاقستان رەسپۋبليكاسىنىڭ پرەمەر-ءمينيسترى لاۋازىمىنا تاعايىنداۋعا كەلىسىم بەرۋى ءۇشىن اسقار ءماميننىڭ كانديداتۋراسىن پارلامەنت ءماجىلىسىنىڭ قاراۋىنا ۇسىندى.
مەملەكەت باسشىسى ءوزىنىڭ شەشىمىن تۇسىندىرە كەلە, اسقار ءماميننىڭ بىلىكتى ءارى تاجىريبەلى, ەڭبەكقور, تالاپشىل جانە پاراساتتى مەملەكەتتىك قىزمەتشى ەكەنىن اتاپ ءوتتى.
– ول الدىمىزدا تۇرعان ماقسات-مىندەتتەردى جاقسى تۇسىنەدى. ونىڭ ۇكىمەتتەگى ناتيجەلى جۇمىسى – سونىڭ ايقىن دالەلى, – دەدى پرەزيدەنت.
جيىن سوڭىندا قاسىم-جومارت توقاەۆ ءماجىلىس دەپۋتاتتارىنا ءوزى ۇسىنعان كانديداتۋرانى قولداعانى ءۇشىن ريزاشىلىعىن ءبىلدىرىپ, اسقار ءماميندى جاۋاپتى لاۋازىمعا تاعايىندالۋىمەن قۇتتىقتادى.