قازاقستاندا 2021 جىلعى 1 قاڭتاردان باستاپ الەۋمەتتىك سالا قىزمەتكەرلەرىنىڭ لاۋازىمدىق جالاقىسى 50% - عا ءوستى. 2022 جىلى لاۋازىمدىق جالاقى 25% – عا, ال 2023 جىلى تاعى 25% - عا وسەدى. بۇل ماقساتقا مەملەكەتتىك بيۋدجەتتەن الداعى ءۇش جىلعا 95 ملرد تەڭگە ءبولىندى.
قر ۇكىمەتىنىڭ اعىمداعى جىلعى 12 قاڭتاردا وتكەن وتىرىسى اياسىندا «ازاماتتىق قىزمەتشىلەرگە, مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە, قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» قازاقستان رەسپۋبليكاسى ۇكىمەتىنىڭ 2015 جىلعى 31 جەلتوقسانداعى № 1193 قاۋلىسىنا وزگەرىستەر ەنگىزۋ تۋرالى» قاۋلى قابىلداندى, وعان سايكەس ءوز قىزمەتىن ستاتسيونارلىق جانە جارتىلاي ستاتسيونارلىق ۇلگىدەگى مەديتسينالىق-الەۋمەتتىك مەكەمەلەردە (بۇدان ءارى – ءمام), ۇيدە قىزمەت كورسەتۋ ۇيىمدارىندا, ۋاقىتشا بولۋ ۇيىمدارىندا جانە جۇمىسپەن قامتۋ ورتالىقتارىندا جۇزەگە اسىراتىن باسشى قۇرام مەن نەگىزگى پەرسونالدىڭ (الەۋمەتتىك قىزمەتكەرلەر, پەداگوگتار, مەديتسينا قىزمەتكەرلەرى جانە ت.ب.) لاۋازىمدىق جالاقىسىن ءۇش جىل ىشىندە ارتتىرۋ كوزدەلگەن.
ناتيجەسىندە 2021 جىلعى 1 قاڭتاردان باستاپ وسى قىزمەتكەرلەردىڭ لاۋازىمدىق ايلىقاقىسى 50%-عا, 2022 جىلى اعىمداعى ماننەن 25%-عا, 2023 جىلى تاعى 25%-عا وسەدى.
قاۋلىدا سونداي-اق قولدانىستاعى قوسىمشا اقىنىڭ مولشەرىن بازالىق لاۋازىمدىق جالاقىنىڭ 30% - ىنان لاۋازىمدىق جالاقىنىڭ 40% - ىنا وزگەرتۋ جولىمەن ستاتسيونارلىق جانە جارتىلاي ستاتسيونارلىق ۇلگىدەگى ءمام-دە, ۇيدە قىزمەت كورسەتۋ جانە ۋاقىتشا بولۋ ۇيىمدارىندا جۇمىس ىستەيتىن اكىمشىلىك جانە قوسالقى پەرسونال ءۇشىن جالاقىنى ارتتىرۋ كوزدەلگەن.
وسى ماسەلەنى ىسكە اسىرۋ الەۋمەتتىك قورعاۋ قىزمەتكەرلەرىنىڭ ەڭبەكاقى دەڭگەيىن ءبىلىم بەرۋ جانە دەنساۋلىق ساقتاۋ سالالارى قىزمەتكەرلەرىنىڭ جالاقىسىنا جاقىنداتۋعا مۇمكىندىك بەرەدى, بۇل كادرلاردى ساقتاۋعا جانە حالىققا ساپالى الەۋمەتتىك قىزمەت كورسەتۋگە ىقپال ەتەتىن بولادى.