قاراۋسىز قالعان مال ۇرلانادى

بۇرىنعى ۋاقىتتا ۇرىلار دا الىستان كەل­مەي­تىن بولسا, سوڭعى جىلدارى قاي جاقتىڭ ۇرىسى كەلىپ, الىپ كەتكەنىن جۇرت بىلە الماي دال. ويتكەنى, بۇل قىلمىسقا ابدەن ماشىقتانعان قاسكۇنەمدەر مالدى بىردەن سويىپ, ەتىن ساتىپ جىبەرەتىندىكتەن, قىلمىستى دالەلدەۋ وڭايعا سوقپايدى. وسىلايشا قىلمىستىڭ ءبىر شەتى مال بازارلارىنداعى ەت ساتۋشىلارعا دا كەلىپ تىرەلەدى. مال ۇرلىعىنا قاتىستى زاڭ تالاپتارى قاتاڭداتىلعانىنا قاراماستان, قىلمىس كۇز بەن قىس كەزىندە ءتىپتى كۇشەيە تۇسەدى.

پوليتسەيلەر «قىلمىسپەن كۇرەسۋدىڭ ەڭ ءتيىمدى ءتاسىلى – ونىڭ الدىن الۋ», دەيدى. اۋىل ادامدارى بەيقام وتىرماي, مال باعۋ جۇمىستارىن وزدەرى ۇيىمداستىرىپ, اۋىل اكىمدەرى مەن ۋچاسكەلىك پوليتسەيلەر تۇرعىندار اراسىندا ءتۇسىندىرۋ جۇمىستارىن جۇرگىزۋى كەرەك. ويتكەنى, وسى كەزگە دەيىن ۇرلانعان مالدىڭ نەگىزگى بولىگىن جايىلىمدا قاراۋسىز جۇرگەن جەكە ادامداردىڭ مالى قۇرايدى. سونىڭ ىشىندە كۇزگى ۋاقىتتا كۇزەتتى كۇشەيتىپ, شارۋاشىلىقتار مال قورالارىنا دابىل قوندىرعىلارى مەن جارىق ورناتۋى قىلمىستىڭ الدىن الۋدىڭ ەڭ توتە جولى.

اقتوبە وبلىستىق پد باستىعى اتىعاي ارىستانوۆتىڭ ايتۋىنشا, ەندى مال ۇرلىعى ءۇشىن قك 188-1 بابى بويىنشا, 3000 اەك دەيىن (8 334 000 تەڭگەگە دەيىن) ايىپپۇل سالىنادى نەمەسە 5 جىلعا دەيىن باس بوستاندىعىنان ايىرۋ جازاسى قاراستىرىلعان. جەكە تۇرعىن ءۇي-جاي نەمەسە شارۋاشىلىقتىڭ, كاسىپورىننىڭ قوراسىنان مال ۇرلاعاندارعا 5 جىلدان 10 جىلعا دەيىن باس بوستاندىعىنان ايىرۋ جازاسى كەسىلەدى. سونداي-اق ۇيىمداسقان تۇردە قىلمىس جاساعانداردىڭ بىرنەشە مالدى ۇرلاعاندارى دالەلدەنسە, قولعا تۇسكەندەر 7 جىلدان 12 جىلعا دەيىن باس بوستاندىعىنان ايىرۋ جازاسىنا كەسىلەدى. ءتارتىپ ساقشىلارى مال باعۋ جۇمىسى جاقسى ۇيىمداستىرىلىپ, جانۋارلارعا ەن-تاڭبا جاپسىرمالارى سالىنىپ, GPS ترەكەرلەرى پايدالانىلعان, قىسقاسى مال ۇرلىعىن الدىن الۋ شارالارى قابىلدانعان اۋدانداردا جاز بەن كۇزدە قىلمىس تىركەلمەگەنىن حابارلادى. ال الىس اۋىلداردا جايىلىمداعى مال بۇرىنعىسىنشا قاراۋسىز جۇرەدى. سوندىقتان پوليتسەيلەر, اسىرەسە كۇز-قىس ايلارىندا تەبىندەگى جىلقىلارىنا اباي بولۋعا شاقىرادى.

اقتوبە وبلىسى