ورال قالاسىندا 180 پاتەرلىك توعىز قاباتتى ءۇي پايدالانۋعا بەرىلدى, دەپ حابارلايدى Egemen.kz
ونىڭ اشىلۋ راسىمىنە قاتىسقان ورال قالاسىنىڭ اكىمى ابات شىنىبەكوۆتىڭ ءمالىم ەتكەنىندەي, ەلباسىنىڭ باستاماسىمەن قابىلدانعان «نۇرلى جەر» باعدارلاماسى بىرنەشە جىلدان بەرى ءساتتى جۇزەگە اسىرىلىپ كەلەدى.
مەملەكەت باسشىسى قازاقستان حالقىنا ارناعان وتكەن جىلعى جولداۋىندا تۇرعىنداردى قولجەتىمدى باسپانامەن قامتۋدىڭ ماڭىزدىلىعىن اتاپ كورسەتكەن بولاتىن. وسىعان وراي حالىقتى جايلى قونىسپەن قامتۋ, ينفراقۇرىلىمداردى تارتۋ جەرگىلىكتى اتقارۋشى ورگاندارعا جۇكتەلگەن ەدى.
«قيىندىقتارعا قاراماستان, وتكەن جىل تابىستى بولدى دەۋگە تولىق نەگىز بار. ورال قالاسىندا 7 كوپقاباتتى تۇرعىن ءۇي ىسكە قوسىلدى. مىنە, بۇدان بىرنەشە جىل بۇرىن بوس جاتقان جەردە ۇلكەن تۇرعىن ءۇي كەشەنى بوي كوتەردى. جەكە ينۆەستورلار ەسەبىنەن وسى ماڭدا 900 ورىندىق مەكتەپ سالىناتىن بولادى. بالالار مەن جاسوسپىرىمدەر سپورت مەكتەبىنىڭ قۇرىلىسى كوزدەلۋدە. اۋلالاردى اباتتاندىرۋ, سپورت الاڭدارىن, دەمالىس ورىندارىن سالۋ جۇمىستارى جۇرگىزىلەدى. جاڭا ۇيلەردەگى پاتەرلەر تۇرعىن ءۇي قۇرىلىس جيناق بانكى سالىمشىلارىنا جانە كەزەكتە تۇرعان ازاماتتارعا بەرىلۋدە», دەدى ابات اباي ۇلى.
زاچاگان كەنتىندە بوي كوتەرگەن تۇرعىن ءۇيدىڭ مەردىگەرى – «التاير-سك7» جشس. جالپى الاڭى 10609,50 شارشى مەتر ءۇيدىڭ 54-ءى – ءبىر, 81-ءى – ءۇش, 45-ءى – ءۇش بولمەلى پاتەرلەر. ءار شارشى مەتردىڭ ناقتى قۇنى 166055 تەڭگە بولعانىمەن, ول تۇرعىندارعا 140 مىڭ تەڭگەگە ءتۇسىپ وتىر. 26055 تەڭگە جەرگىلىكتى بيۋدجەت ەسەبىنەن وتەلەدى.
ەسكە سالا كەتەيىك, بۇدان بۇرىن ورالدا جاڭا جىل قارساڭىندا 216 وتباسىنىڭ باسپانالى بولعانىن, مودۋلدىك ينفەكتسيالىق اۋرۋحانانىڭ پايدالانۋعا بەرىلگەنىن جازعان ەدىك.