Gazeta.uz دەرەككوزى بويىنشا قازاقستان, اقش جانە وزبەكستان ۇكىمەتتەرى ورتالىق ازيا ينۆەستيتسيالىق سەرىكتەستىگىن قۇرعانىن جاريالاعانىن, ونىڭ العاشقى بەس جىلداعى تابىسى 1 ملرد اقش دوللارىنان اساتىنىن ءمالىم ەتتى, دەپ حابارلايدى Egemen.kz
«وسى باستاما اياسىندا وزبەكستاننىڭ ينۆەستيتسيالار جانە سىرتقى ساۋدا مينيسترلىگى, «استانا» حالىقارالىق قارجى ورتالىعى جانە اقش-تىڭ حالىقارالىق دامۋ جونىندەگى قارجى كورپوراتسياسى (DFC) بەس جىل ىشىندە كەم دەگەندە 1 ميلليارد دوللار تارتۋ ءۇشىن بارلىق كۇش-جىگەرىن سالادى», دەلىنگەن حابارلامادا.
ورتالىق ازيا ينۆەستيتسيالىق سەرىكتەستىگى «حالىقارالىق ينفراقۇرىلىم ساپاسىنىڭ ستاندارتتارىن مىسالعا كەلتىرەتىن جانە ينكليۋزيۆتى, اشىق جانە ورنىقتى ينۆەستيتسيالاردى العا تارتاتىن» جەكە سەكتور باسقاراتىن جوبالاردى ىلگەرىلەتەدى. بۇل رەتتە سەرىكتەستەر جوبالاردىڭ تابىسى مەن وڭ اسەرىن ماكسيمالدى تۇردە ارتتىرادى جانە ايماققا قوسىمشا جەكە ينۆەستيتسيالاردى جۇمىلدىرادى. ورتالىق ازيا ينۆەستيتسيالىق سەرىكتەستىگى C5 + 1 پلاتفورماسى ارقىلى جۇمىس ىستەيدى (ورتالىق ازيا ەلدەرى – اقش).
«بۇل باستاما ورتالىق ازيانىڭ بارلىق ەلدەرىن نىعايتۋ جانە وركەندەتۋ ءۇشىن ساۋدانى, دامۋدى جانە سينەرگيانى ارتتىرۋ مۇمكىندىكتەرىن پايدالانۋعا تىرىسادى. ايماق COVID-19 پاندەمياسىنان تۋىنداعان ەكونوميكالىق قۇلدىراۋدى قالپىنا كەلتىرۋگە تىرىسىپ جاتقان كەزدە, مۇنداي ىنتىماقتاستىق پەن تۇراقتىلىق بۇرىنعىدان دا ماڭىزدى بولىپ وتىر», دەيدى ساراپشىلار.
ايماقتىق جوبالاردى قولداۋمەن قاتار, DFC وزبەكستاننىڭ ينۆەستيتسيالار جانە سىرتقى ساۋدا مينيسترلىگىمەن جانە «استانا» حالىقارالىق قارجى ورتالىعىمەن ەكىجاقتى تۇسىنىستىك مەموراندۋمدارىنا قول قويۋ ارقىلى ورتالىق ازياداعى ەكىجاقتى سەرىكتەستىگىن تەرەڭدەتە بەرەدى.