اقتوبە قالاسىنىڭ تۇرعىنى سەرىك تولەۋباەۆ وبلىستىق تاريحي-ولكەتانۋ مۋزەيىنە حرومتاۋ اۋدانىنىڭ تاسوتكەل ەلدى مەكەنى جانىنداعى قورىمنان قاسىم ءومىرحان ۇلى تاپقان ەسكى كىتاپتاردى تاپسىردى.
2019 جىلى جازدا قارامولا اتانعان ەسكى قورىم جانىندا قوي باعىپ جۇرگەن قاسىم قابىردىڭ جانىندا جارتىلاي اشىلىپ قالعان كىتاپتاردى كورگەن. بۇل جونىندە اۋىلدىڭ ۇلكەن كىسىلەرىنە بارىپ ايتقانىمەن, ولار باستاپقىدا كىتاپتاردى قازىپ الۋعا جۇرەكسىنىپ, اقتوبەلىك جۋرناليست سەرىك ءابجامي ۇلىنا حابارلاسادى. سودان ولار پاراقتارى ۇگىتىلگەن اراب تىلىندەگى ەسكى كىتاپتاردى قازىپ الىپ, وبلىستىق تاريحي-ولكەتانۋ مۋزەيىنە اكەلىپ تاپسىرعان.
«نۇر عاسىر» مەشىتىنىڭ باس يمامى تولەبي وسپاننىڭ ايتۋىنا قاراعاندا, بۇلار – يسلام شاريعاتى تۋرالى كىتاپتار جيىنتىعى. 1930 جىلدارى ءدىن ادامدارىن قۋدالاۋ كەزىندە تاسوتكەل اۋىلىنىڭ تۇرعىندارى قورىمعا اپارىپ جاسىرعان بولۋى ابدەن مۇمكىن. وبلىستىق تاريحي-ولكەتانۋ مۋزەيى عىلىمي-زەرتتەۋ ءبولىمىنىڭ مەڭگەرۋشىسى ءلاززات نۇركەەۆا ءحىح عاسىردىڭ سوڭى مەن حح عاسىردىڭ باسىندا شىققان كىتاپتار ەكەندىگىن ايتتى. قازان قالاسىندا باسىلعان ءدىني كىتاپتار توڭكەرىسكە دەيىن قارابۇتاق وڭىرىندەگى مەشىت ۇستاعان يمامدار مەن مەدرەسە وقىتۋشىلارىنىڭ قولىنداعى قۇندى دۇنيە بولعانى اقيقات.
قورىمنان تابىلعان ەسكى كىتاپتار قايتا قالپىنا كەلتىرىلىپ, ماماندار باسپاسى مەن اۆتورلارى, شىققان جىلدارىن انىقتاعان سوڭ وبلىستىق تاريحي-ولكەتانۋ مۋزەيىنىڭ ەكسپوزيتسياسىنا قويىلادى.
اقتوبە