قازاقستان رەسپۋبليكاسى زاڭناماسىنىڭ تالاپتارىنا سايكەس «اتف بانك» اق-تىڭ Jýsan توبىنا قوسىلۋى بويىنشا مامىلەنى ىسكە اسىرۋ ءۇشىن اگەنتتىك «Jýsan بانك» اق-قا اتف بانكتىڭ 99,76% اكتسيالارىن ساتىپ الۋعا جانە «اتف بانك» اق-تىڭ ءىرى اكتسيونەرى ع.ش.ەسەنوۆ مىرزاعا Jýsan بانكتىڭ 19,97% اكتسيالارىن يەلەنۋگە كەلىسىم بەردى, دەپ حابارلايدى Egemen.kz
سونىمەن بىرگە مامىلەگە قاتىسۋشىلار اتف بانكتىڭ ەنشىلەس ۇيىمى, «وپتيما بانك» اق-قا قاتىستى قىرعىز رەسپۋبليكاسى ۇلتتىق بانكىنىڭ تاراپىنان اكتسيونەردى اۋىستىرۋعا قاجەتتى رۇقساتتار الدى.
بانكتەردىڭ بىرىگۋىنىڭ قارجىلىق مودەلى قوسىلۋ مەن بىرىگۋدىڭ كلاسسيكالىق مودەلىنە (M&A) سايكەس كەلەدى, وندا بانكتىڭ 124 ملرد تەڭگە مولشەرىندەگى مەنشىكتى كاپيتالى قوسىمشا پروۆيزيالار قۇرۋ ءۇشىن پايدالانىلدى. جۇمىس ىستەپ تۇرعان اكتسيونەر شىعىنداردى وتەگەننەن كەيىن Jýsan بانك اتف بانكتى 97 ملرد تەڭگە سوماعا ۇستەمە كاپيتالداندىرۋدى جۇزەگە اسىرىپ, رەتتەۋشىنىڭ تالاپتارىنا سايكەس كاپيتالدىڭ جەتكىلىكتى دەڭگەيىن قالىپتاستىردى. مامىلەنىڭ قورىتىندىسى بويىنشا اتف بانك پروۆيزيالاردىڭ قاجەتتى كولەمىن قۇردى, ونىڭ كاپيتالى مەن وتىمدىلىگىنىڭ جەتكىلىكتى قورى بار, بۇل ۇزاق مەرزىمدى بولاشاقتا بانكتىڭ قارجىلىق ورنىقتىلىعىن جانە تۇراقتى دامۋىن قامتاماسىز ەتەدى.
اگەنتتىك قازاقستاننىڭ اسا ءىرى بانكتەرىنىڭ بيزنەس-مودەلدەرىن بىرىكتىرۋ بانك سەكتورىنىڭ تۇراقتىلىعىن ارتتىرۋعا جانە ەكى بانكتىڭ قارجىلىق ءارى تەحنولوگيالىق ارتىقشىلىقتارىن پايدالانۋ ەسەبىنەن حالىققا كورسەتىلەتىن قىزمەتتەردىڭ ساپاسىن جاقسارتۋعا ىقپال ەتەدى دەپ ەسەپتەيدى. Jýsan Bank جانە اتف بانك اكتيۆتەرىنىڭ جيىنتىق كولەمى 3 ترلن تەڭگەگە جۋىق, ال ەكى بانكتىڭ جالپى نارىقتىق ۇلەسى بانك سەكتورى اكتيۆتەرىنىڭ 10%-ىنا جەتەدى دەپ كۇتىلەدى.
Jýsan Bank جانە اتف بانكتىڭ اعىمداعى قىزمەتى, سونداي-اق بانكتەردىڭ كليەنتتەرى ءۇشىن كورسەتىلەتىن قىزمەتتەردىڭ قولجەتىمدىلىگى ۋاقتىلى جانە تولىق كولەمدە جۇزەگە اسىرىلادى.