كينويندۋستريا سالاسىندا بالالاردى قىزىقتىراتىن جانردىڭ ءبىرى – مۋلتفيلم. ال وزگە تىلدەگى مۋلتفيلمدەردى بالالاردىڭ ءوزى قازاقشا دۋبلياج جاساسا شە؟ اتىراۋداعى نازارباەۆ زياتكەرلىك مەكتەبىنىڭ وقۋشىلارى انيماتسيالىق فيلمدەردى قازاق تىلىنە اۋدارۋ ارقىلى دىبىستاۋدى قولعا الدى. ماقسات – قازاقتىلدى كونتەنتتى دامىتىپ, دۋبلياج ءىسىن ناسيحاتتاۋ.
– قاشىقتان وقىتۋ باستالعالى بەرى بوس ۋاقىتىمىز كوبەيدى. NIS Graphics كلۋبىنىڭ مۇشەلەرى اراسىنداعى بايلانىستى ۇزبەۋ ءۇشىن بىرنەشە ءمۋلتفيلمدى قازاق تىلىنە اۋدارىپ, ولاردى دىبىستاۋدى قولعا الدىق, – دەيدى كلۋبتىڭ نەگىزىن قالاۋشى, نازارباەۆ زياتكەرلىك مەكتەبىنىڭ 10-سىنىپ وقۋشىسى ارۋجان ەلدوسوۆا.
دۋبلياج ىسىنە قىزىققان وقۋشىلار دىبىستاعان تۋىندىلاردىڭ اراسىندا «موي مالەنكي پوني», «حولودنوە سەردتسە» جانە «سۋپەركروشكا» مۋلتفيلمدەرى بار. وقۋشىلار انيماتسيالىق كەيىپكەرلەردىڭ اڭگىمەسىن ىلەسپە اۋدارمامەن اۋدارىپ, ساپالى دۋبلياج جاساۋ ىسىنە ماشىقتانىپ جاتىر.
– بۇل – ءبىزدىڭ العاشقى تاجىريبەمىز. سوعان قاراماستان, دۋبلياجدىڭ ساپاسى تالاپقا سايكەس بولۋىنا باسا نازار اۋدارىپ وتىرمىز. ويتكەنى كەيىپكەرلەردىڭ مىنەزى مەن ەموتسياسىن سول كۇيىندە جەتكىزۋ ءۇشىن تولىق رولگە ەنۋ كەرەك. بولاشاقتا دىبىستاۋدى ساپالى دەڭگەيگە كوتەرىپ, ۇزاقمەتراجدى فيلمدەردى قازاق تىلىنە اۋدارۋدى كوزدەپ وتىرمىز, – دەدى ارۋجان ەلدوسوۆا.
NIS Graphics كلۋبىنىڭ مۇشەلەرىنىڭ ايتۋىنشا, ەلىمىزگە شەتەلدىك مەدياونىمدەر كەش جەتكىزىلەدى. عالامتوردا قازاقستاندىق كورەرمەن ءۇشىن انا تىلىمىزگە اۋدارۋدى قاجەت ەتەتىن فيلمدەر ءالى دە كوپ. سول سەبەپتەن اتىراۋلىق وقۋشىلار عالامتور كەڭىستىگىندە قازاق ءتىلدى مەدياونىمنىڭ كوبەيۋىنە ۇلەس قوسپاق.
اتىراۋ وبلىسى