اتىراۋ وبلىسىندا ءۇش جاتاقحانا اشىلدى

سونىڭ ءبىرى – يندەر اۋدانىنداعى كوپبەيىندى اۋىل شارۋاشىلىق كوللەدجىندەگى 100 ورىندىق جاتاقحانا. ءتورت قاباتتى جاڭا جاتاقحانادا ەكى ورىنعا ارنالعان 12, ءۇش ورىندىق 15, ءتورت ادامعا ەسەپتەلگەن 4 جاتىن بولمە بار. ءار بولمە قاجەتتى جيھازدارمەن جابدىقتالدى.

ەكىنشىسى – اتىراۋ ەنەرگەتيكا جانە قۇرىلىس كوللەدجىنىڭ ستۋدەنتتەرى ءۇشىن سالىنعان 100 ورىندىق جاتاقحانا. زاماناۋي ۇلگىمەن بوي كوتەرگەن جاتاقحانانىڭ ءتورت قاباتتا ءتورت تەلەديدار مەن 12 اۆتوماتتى كىر جۋ ماشينكاسى بار.

ءۇشىنشى جاتاقحانا جىلىوي اۋدانىنداعى س.وتەباەۆ اتىنداعى مۇناي جانە گاز تەحنولوگيالىق كوللەدجىندە اشىلدى. بۇل جاتاقحانا 60 ورىنعا ەسەپتەلىپتى. مۇندا دا جاڭا جيھازدار, توسەك ورىن, توڭازىتقىش, تەلەديدار, بەينەكامەرا, ستۋدەنتتەرگە ارنالعان كىتاپحانا, اسحانا, دەمالىس زالى, سالاۋاتتى ءومىر سالتىن ۇستانۋ ماقساتىندا سپورتتىق الاڭ سالىندى.

ءۇش جاتاقحانادا دا ستۋدەنتتەرمەن بىرگە, كوللەدجدەردە جۇمىس ىستەيتىن وقىتۋشىلاردىڭ جاس وتباسىلارى تۇرا الادى.

«وڭىردەگى 24 تەحنيكالىق جانە كاسىپتىك كوللەدجدەردە 15 مىڭنان استام ستۋدەنت ءبىلىم الادى. باسقا ايماقتان كەلگەن ستۋدەنتتەر مەن وقىتۋشىلار ءۇشىن جاتاقحانا ماسەلەسى ماڭىزدى بولىپ وتىر. وسىعان وراي 2022 جىلعا دەيىن جاتاقحاناعا سۇرانىستى تولىق شەشۋدى كوزدەپ وتىرمىز», دەيدى وبلىستىق ءبىلىم باسقارماسىنىڭ باسشىسى ساتقان ەسەنعاليەۆ.