ADAL ساياسي پارتياسى ۇگىت-ناسيحات توبىنىڭ حالىقپەن وڭىرلىك كەزدەسۋلەرىنىڭ قورىتىندىسى شىعارىلدى. 11-28 جەلتوقسان ارالىعىندا ەلىمىزدىڭ قالالارى مەن اۋىلدارىندا 3583 كەزدەسۋ وتسە, وعان 71256 ادام قاتىسقان.
ۇگىت-ناسيحات كەزەڭىندە پارتيا قاتارى 57 مىڭ ادامعا كوبەيدى, قازىرگى ۋاقىتتا پارتيا مۇشەلەرىنىڭ سانى 111 875 ازاماتتى قۇرايدى. قولدانىستاعى ەرەجەلەرگە سايكەس ايماقتارداعى كەزدەسۋلەرگە قاتىسۋشىلاردىڭ سانى شەكتەۋلى بولدى. دەگەنمەن, ADAL وكىلدەرى سايلاۋشىلارمەن تىكەلەي كەزدەسۋلەردىڭ فورماتىن تاڭداعاندى ءجون كوردى. سوندىقتان ءماجىلىس دەپۋتاتتىعىنا كانديدات ADAL پارتياسىنىڭ 16 ۇمىتكەرى ەلىمىزدىڭ ايماقتارىنا اتتاندى.
ءوڭىر تۇرعىندارى كوپتەگەن پروبلەمالىق ماسەلەنى اتاپ ءوتتى. كوبىنە تۇرعىندار ينفراقۇرىلىمعا قاتىستى تۇيتكىلدەرگە – ناشار جولدارعا, جالاقىنىڭ تومەندىگىنە, مەملەكەتتىك ورگانداردىڭ بيۋروكراتياسىنا جانە جەكە قاجەتتىلىكتەرگە ارنالعان جەردىڭ جەتىسپەۋىنە شاعىمداندى. سونداي-اق ءوڭىر تۇرعىندارى قورشاعان ورتانىڭ ناشارلىعى مەن مەديتسينالىق كومەك الۋ ماسەلەلەرىن دە كوتەردى. ماسەلەن, ايىرتاۋ اۋدانىنىڭ تۇرعىندارى اۋىز سۋدىڭ جوقتىعىنا نارازى. حالىق سۋدى كولىكپەن تاسىپ ىشەدى. قىزىلجار ءوڭىرىنىڭ تۇرعىندارىنا كاسىپكەرلىك ءۇشىن جەر تەلىمىن الۋ قيىن. سونىمەن قاتار اۋىل تۇرعىندارى مەكتەپ وقۋلىقتارىنىڭ ساپاسىزدىعىن ايتىپ شاعىمداندى.
جالپى, كەزدەسۋلەر كەزىندە تۇرعىنداردىڭ اتقارۋشى ورگاندار جۇمىسىنان بەيحابار ەكەندىگى انىقتالدى. حالىق قانداي دا ءبىر ماسەلەلەردى شەشۋ ءۇشىن قانداي مەملەكەتتىك مەكەمەگە حابارلاسۋ كەرەك ەكەنىن بىلمەيدى.
ADAL پارتياسىنىڭ وكىلدەرى بۇعان دەيىن بىرنەشە وڭىرگە بارعان بولاتىن. ساپار بارىسىندا تۇرعىندار بالالارىنىڭ مەكتەپتەگى شامادان تىس جۇكتەمەسىنە جانە وقۋ ساپاسىنا كوڭىلى تولمايتىندىعىن ءبىلدىردى. سونداي-اق اتا-انالار بالاباقشالار بالالاردى ءۇش جاستان باستاپ قابىلدايتىندىعىن ايتىپ, ال جاردەماقىنىڭ ءبىر جىلعا دەيىن عانا بەرىلەتىندىنە شاعىمداندى.
سونداي-اق پارتيا وكىلدەرىمەن كەزدەسۋ بارىسىندا تۇرعىندار اۋىلدارعا اۋىز سۋ جەتكىزىلمەگەنىن, جارىق قوسىلماعانىن ايتادى. كەي وڭىرلەردە كوپ بالالى انالاردىڭ دا ماسەلەسى وزەكتى كۇيىندە قالىپ وتىر. ماسەلەن, الماتى وبلىسى بالپىق بي اۋىلىنىڭ تۇرعىنى, 8 بالانىڭ اناسى ءبىر جىلدان استام ۋاقىت بويى مەملەكەت ۇسىنعان ۇيگە قۇجاتتار الا الماي ءجۇر ەكەن. سونداي-اق قوسىلۋ قۇنىنىڭ قىمباتتىعىنا بايلانىستى ۇيىنە گاز كىرگىزە الماي وتىر.
شىعىس قازاقستان وبلىسى جارما اۋدانى, شىمىلدىق اۋىلى تۇرعىندارىنىڭ ايتۋىنشا, 2018 جىلى اۋىلدا كوشە جارىعىنىڭ باعاندارى ورناتىلعان, الايدا شىمىلدىقتا ەكى جىل وتسە دە جارىق قوسىلماعان. سول سياقتى ءدال سول اۋىلدا سۋمەن قامتاماسىز ەتۋ ماسەلەسى دە شەشىمىن تاپپاعان. ماماندار 2019 جىلى ۇڭعىما بۇرعىلاعانىمەن, ول دا جۇمىس ىستەمەيدى ەكەن. تۇرعىندار وسى ۋاقىت ىشىندە ءارتۇرلى ورگاندارعا جۇگىنگەندەرىن ايتادى. بىراق ول ارەكەتتەرىنەن ەش ناتيجە شىقپاعان.
تۇرعىندار سونىمەن قاتار يپوتەكا بويىنشا ساتىپ الىنعان تۇرعىن ءۇي ءۇشىن ارتىق تولەم سوماسى تىم كوپ ەكەنىنە نارازىلىق بىلدىرەدى. ياعني, يپوتەكا العاندار پاتەر ءۇشىن ەكى ەسە ارتىق تولەم جاسايدى. اۋىل حالقى پايىزدىڭ ۇستەمەاقى نەگىزگى قارىزدان اسىپ كەتەتىنىنە نارازى.
پارتيا اتالعان وزەكتى پروبلەمالاردى شەشۋدىڭ ءتيىمدى تاسىلدەرىن ۇسىنىپ وتىر. ADAL پارتياسى سايلاۋ ناتيجەلەرىنە قاراماستان, جوعارىداعى پروبلەمالاردى شەشۋمەن اينالىسۋدى جالعاستىرا بەرەدى.
ء«بىز ءار ايماق تۇرعىندارى پروبلەمالارىنىڭ ۇلكەن دەرەكقورىن جينادىق, سوندىقتان 7 پايىزدىق مەجەدەن وتپەسەك تە وسى ماسەلەلەردى شەشۋدى جالعاستىرا بەرەمىز. وڭىرلەردەگى جوبالىق كەڭسەلەر فورماتىندا جۇمىس ىستەيمىز», دەدى دەپۋتاتتىققا كانديدات ولجاس ورداباەۆ.
سونداي-اق 28 جەلتوقساندا ەۋروپالىق وداق ەلدەرىنىڭ وكىلدەرىمەن ونلاين-كەزدەسۋ ءوتتى. پارتيا اپپاراتىنىڭ باسشىسى باۋىرجان ورازعاليەۆ ADAL پارتياسىنىڭ ماقساتتارى مەن مىندەتتەرى تۋرالى ايتىپ بەردى. كەزدەسۋ قورىتىندىسى بويىنشا تاراپتار بۇكىل سايلاۋ كەزەڭى ىشىندە بەلسەندى ءوزارا قارىم-قاتىناس جاساۋ جونىندە ۋاعدالاستى.