امەريكا سەناتورلارى مەن كونگرەسسمەندەرى قورعانىس بيۋدجەتىنىڭ جوباسىن بەكىتتى. سوعان سايكەس, 2021 جىلى اق ءۇي اسكەري قاجەتتىلىككە 740 ميلليارد دوللار جۇمساماق.
بۇل مول قاراجات قارۋلى كۇشتەردى مودەرنيزاتسيالاۋ, جاڭا تەحنولوگيالاردى دامىتۋ, سونداي-اق اقش-تىڭ گەوساياسي ىقپالىن ودان ءارى كەڭەيتۋ ماقساتىندا جۇمسالادى.
قورعانىس بيۋدجەتىنە اقش پرەزيدەنتى دونالد ترامپ نارازىلىق تانىتىپ وتىر. اسىرەسە اق ءۇي باسشىسى ينتەرنەت-پلاتفورمالارداعى جازبالاردى باقىلاۋ ماسەلەسىنە قاتىستى ءجيى داۋ شىعارادى. بۇعان دەيىن Twitter, Facebook سەكىلدى بىرقاتار الەۋمەتتىك جەلى د.ترامپتىڭ كەي جازبالارىن جالعان اقپارات رەتىندە ايگىلەگەن-ءدى.
تاياۋدا دونالد ترامپ قۇجاتقا ۆەتو قويۋ قۇقىعىن قولداناتىنىن ايتتى. دەگەنمەن, كونگرەسسمەندەردىڭ 300-ءى بيۋدجەت جوباسىن قولداپ داۋىس بەردى. الدا-جالدا پرەزيدەنت ۆەتو قويا قالسا, دەپۋتاتتار ونى ەڭسەرۋگە مۇمكىندىگى بار. ياعني وكىلدەر پالاتاسىندا زاڭ قايتا ماقۇلدانسا, قۇجات قابىلدانادى.
پەنتاگوننىڭ نەگىزگى قاجەتتىلىكتەرىنە 635,5 ملرد دوللار جۇمسالماق. قالعان قاراجات ەنەرگەتيكا سالاسىنداعى ۇلتتىق قاۋىپسىزدىك باعدارلامالارىنا (26,6 ملرد) جانە شەتەلدەگى وپەراتسيالارعا (69 ملرد) باعىتتالادى. ءۇش جىل ىشىندە دىبىستان جىلدام تەحنولوگيالاردى قارۋلاندىرۋ سالاسىنا قارجى ءبولۋ قاجەتتىلىگى ەرەكشە ەسكەرىلگەن.
يادرولىق ۇشتىكتى مودەرنيزاتسيالاۋعا شامامەن 30 ملرد دوللار بولىنگەن. بۇل قاراجات بايلانىس جانە باسقارۋدىڭ جاڭا جۇيەلەرىن ازىرلەۋگە جۇمسالادى. زىمىران شابۋىلدارىنا قارسى كۇرەس جۇيەلەرىن دامىتۋعا 20 ميلليارد دوللار جۇمساۋ كوزدەلسە, عارىش اسكەرلەرىنە 15 ميلليارد دوللار رەزەرۆكە قويىلىپ وتىر. 10 ملرد-قا جۋىق قاراجات كيبەركەڭىستىكتەگى وپەراتسيالارعا باعىتتالادى.