ەكىنشى سەمەستردەن باستاپ كاسىپتىك جانە تەحنيكالىق ءبىلىم بەرۋ ۇيىمدارىندا ۆەدومستۆوارالىق كوميسسيا شەشىمىنە سايكەس 1-كۋرستىڭ 8223 ستۋدەنتى پاندەردىڭ 70%-ىن ادەتتەگى رەجيمدە جانە 30%-ىن قاشىقتان ارالاس وقىتۋعا اۋىسادى.
بۇگىنگى تاڭدا كوللەدجدەر 100% ءبىلىم بەرۋدىڭ اقپاراتتىق رەسۋرستارىمەن قامتاماسىز ەتىلگەن. بۇل تۋرالى بريفينگ بارىسىندا نۇر-سۇلتان قالالىق ءبىلىم باسقارماسىنىڭ باسشىسى شولپان قادىروۆا ايتتى.
«ادەتتەگى رەجيمدە وقىتۋ 15 ادامنان اسپايتىن كىشى توپتاردا جۇرگىزىلەدى, اۋديتوريانىڭ تولۋ دەڭگەيى 50%-دان اسپايدى. تۇراقتى تۇردە فيزيكا, حيميا, ماتەماتيكا بويىنشا پراكتيكالىق جانە زەرتحانالىق ساباقتار وتكىزىلەدى, قاشىقتان وقىتۋ رەجيمىندە - تاريح, قازاق, ورىس جانە اعىلشىن تىلدەرى, ءوزىن-ءوزى تانۋ, مادەنيەتتانۋ, الەۋمەتتانۋ جانە ت.ب. پاندەرىنەن دارىستەر وقىلادى», - دەپ ءتۇسىندىردى شولپان قادىروۆا.
وندىرىستىك وقىتۋ جانە كاسىپتىك پراكتيكا, زەرتحانالىق جۇمىستار مەن پراكتيكا قاشىقتان شاعىن توپتارداعى ماماندىقتاردىڭ ەرەكشەلىكتەرىنە بايلانىستى كاسىپورىندار بازاسىندا نەمەسە تجكب ۇيىمدارىندا تولىعىمەن نەمەسە ءىشىنارا وتكىزىلەتىن بولادى.
ارالاس فورماتتا وقىتۋدى ۇيىمداستىرعان كەزدە ولاردىڭ باستالۋ جانە اياقتالۋ ۋاقىتىن كورسەتە وتىرىپ, سىنىپتاعى ساباق كەستەسى بولەك قۇراستىرىلادى. سىنىپتارداعى ساباقتار 1,5 مەتردەن كەم ەمەس قاشىقتىقتى جانە ماسكا تاعۋ ءتارتىبىن ساقتاي وتىرىپ وتكىزىلەدى. سىنىپتار اراسىنداعى ءۇزىلىس ءار توپ ءۇشىن جەكە ۇيىمداستىرىلادى. كىتاپتى ۇيگە بەرۋدى قوسپاعاندا, كىتاپحانالارداعى وقۋ زالدارى جابىق. سونداي-اق ستۋدەنتتەرگە, وقىتۋشىلارعا, وندىرىستىك وقىتۋ شەبەرلەرىنە, اتا-انالارعا سانيتارلىق-گيگيەنالىق تالاپتاردى ساقتاۋ تۋرالى نۇسقاۋلار بەرىلەدى, مەديتسينا قىزمەتكەرى ستۋدەنتتەر مەن باسقا جۇمىسشىلاردىڭ دەنساۋلىعىن باقىلاۋدى كۇندەلىكتى قاداعالاپ وتىرادى.
ستۋدەنتتەردى جاتاقحانادان ورىنمەن قامتاماسىز ەتۋ 2693 ورىنعا ارنالعان 15 جاتاقحانا ەسەبىنەن شەشىلەدى. بۇگىنگى تاڭدا مۇقتاج 1281 وقۋشىنىڭ بارلىعى جاتاقحانامەن مەملەكەتتىك ءبىلىم بەرۋ تاپسىرىسى نەگىزىندە قامتاماسىز ەتىلگەن.