كارديوحيرۋرگيا ورتالىعىندا زامانعا ساي جوعارعى تەحنولوگيالىق ەم شارالار مەن كۇردەلى وتالاردىڭ بارلىق ءتۇرى (ونىڭ ىشىندە جۇرەك الماستىرۋعا دەيىن) جاسالادى. ەلىمىزدە مەديتسينالىق ساقتاندىرۋ ەنگىزىلگەلى بەرى جۇرەك-قان تامىر اۋرۋلارىن ەمدەۋ, كۇردەلى وتا جاساتۋ جوسپارلى تۇردە ءمامس جۇيەسىندە جانە تمككك (تەگىن مەديتسينالىق كومەكتىڭ كەپىلدەندىرىلگەن كولەمى) اياسىندا جاسالادى.
«الەۋمەتتىك مەديتسينالىق ساقتاندىرۋ قورى» كەاق نۇر-سۇلتان قالاسى بويىنشا فيليالى ماماندارىنىڭ حابارلاۋىنشا, ەلوردادا ورنالاسقان كارديوحيرۋرگيا ورتالىعىنا قازاقستاننىڭ كەز كەلگەن ايماعىنان ناۋقاستار پورتال, كۆوتا ارقىلى تۇسە الادى. وعان ەشقانداي شەكتەۋ جوق. وتا كەزەگىندە تۇرعان ناۋقاستار كەزەگىن شامامەن 1 ايداي عانا كۇتەدى.
ء«مامس اياسىندا وتا جاساتقىسى كەلەتىن ناۋقاستاردان مىندەتتى تۇردە ەكگ, ەحوكگ, حولتەر مونيتور ەكگ, جەدەل جاردەم كەزىندەگى ەكگ سۇرالادى. وسى تەكسەرۋلەردەن كەين ءبىزدىڭ ورتالىقتا اريتمولوگتىڭ كەڭەسى قاجەت. مامان كەڭەسىن الۋ ءۇشىن بايلانىس ورتالىعىنا حابارلاسىپ, الدىن الا جازىلعان ءجون», دەيدى ۇلتتىق عىلىمي كارديوحيرۋرگيا ورتالىعىنىڭ ينتەرۆەنتسيالىق اريتمولوگيا بولىمشەسىنىڭ مەڭگەرۋشىسى, مەديتسينا عىلىمدارىنىڭ دوكتورى, قاۋىمداستىرىلعان پروفەسسور, قازاق اريتمولوگتار قوعامىنىڭ پرەزيدەنتى ايان ءابدىراحمانوۆ.
ءبىراز ۋاقىت بۇرىن گيپەرتروفيالىق كارديوميوپاتيا دياگنوزىمەن تۇسكەن ناۋقاسقا كارديوحيرۋرگيا ورتالىعىنىڭ دارىگەرلەرى قازاقستاندا جانە ورتالىق ازيادا العاش رەت تەرى استىنا قويىلاتىن كارديوۆەرتەر-دەفيبريللياتور اپپاراتىن قويدى (S-ICD - subcutaneous implantable cardioverter-defibrillator). بۇل اپپاراتتىڭ ەرەكشەلىگى مۇلدەم قان-تامىر جۇيەسىنە ەڭگىزىلمەيدى, سونىمەن قاتار تەرى استىندا تۇرىپ كەنەتتەن بولاتىن جۇرەك ولىمىنەن قۇتقارادى. جاڭا جوعارى تەحنولوگيالىق قىزمەت تۇرىنە جاتاتىن بۇل وتا كارديوحيرۋرگيا ورتالىعىنىڭ كۇشىمەن جاسالدى.
«تاعى ءبىر ەرەكشە مىسال: ناۋقاس 36 جاستا, دياگنوزى – تولىق 3 ساناتتى اۆ-بلوكادا. بىرنەشە رەت ەلەكتروكارديوستيمۋلياتور اۋىستىرىلعان, بىراق قان-تامىر مەن جۇرەك ىشىندەگى ەلەكترودتارى قالا بەرگەن. ءبىزدىڭ ورتالىققا تۇسكەندە ستيمۋلياتوردىڭ ورنى ىرىڭدەپ, سەپسيس بولعان. بۇل جاعدايدا بارلىق ىشتەگى يمپلانتتاردى الۋ قاجەت, ىشتەگى ەلەكترودتار تامىرمەن - جۇرەكپەن ءبىتىپ كەتكەن. ونى الۋ ناۋقاستىڭ ومىرىنە وتە كۇردەلى, بىراق الماسقا امال جوق. ىشتەگى ەلەكترودتاردىڭ ءبارىن الىپ, ورنىنا تمد مەملەكەتتەرى ىشىندە العاشقى بولىپ 2017 جىلدىڭ 22 تامىزىندا ەلەكترودسىز دۇنيە جۇزىندەگى ەڭ كىشكەنتاي Micra ستيمۋلياتورىن ورناتتىق. قازىر ناۋقاستىڭ جاعدايى جاقسى, جىلىنا 1 رەت باقىلاۋعا كەلىپ تۇرادى», دەپ ەسكە الادى ا.ءابدىراحمانوۆ.
قازىر كارديوحيرۋرگيا ورتالىعىندا جۇرەك ىرعاعىنىڭ بۇزىلۋىنا قاتىستى بارلىق زاماناۋي جوعارعى تەحنولوگيالىق وتانى جاساۋعا مۇمكىنشىلىك بار. بىلىكتى دارىگەرلەر ءۇشىن ءتىپتى جاڭا تۋعان نارەستەلەرگە دە وتا جاساۋ – قالىپتى جايت.
«جۇرەك ىرعاعىنىڭ بۇزىلۋى كوبىنە جۇرەك اقاۋى, يشەميا, قان قىسىمىنىڭ كوتەرىلۋى, ت.ب. جۇرەك اۋرۋلارىنىڭ سەبەبىنەن بولادى. سوندىقتان مۇمكىندىگىنشە سپورتپەن اينالىسۋ, ديەتا ۇستانۋ, مايلى تاماقتان تەجەلۋ, ارتىق سالماقتان ارىلۋدىڭ جولىن ىزدەۋ قاجەت. جۇرەك اۋرۋلارىنىڭ الدىن الۋ – سالاماتتى ءومىر سۇرۋگە بايلانىستى» دەپ كەڭەس بەرەدى ماماندار.