قازاقستاننىڭ حالىق ءارتىسى روزا رىمباەۆاعا شىعىس قازاقستان وبلىسىنىڭ قۇرمەتتى ازاماتى اتاعى بەرىلدى, دەپ حابارلايدى Egemen.kz.
وبلىس اكىمدىگىنىڭ ءباساسوز قىزمەتىنىڭ حابارلاۋىنشا, روزا رىمباەۆاعا توسبەلگىنى اكىم دانيال احمەتوۆ تابىس ەتتى.
«بۇگىن قۋانىشتى, ءارى تاريحي كۇن. جاڭا جىل قارساڭىندا جەرلەسىمىز, قازاقستاننىڭ حالىق ءارتىسى روزا قۋانىشقىزى رىمباەۆاعا «شقو قۇرمەتتى ازاماتى» اتاعىن جەكە تاپسىرۋدامىن. مەن ءۇشىن بۇل زور قۇرمەت. ءبىز ءاردايىم جەرلەستەرىمىزدىڭ جەڭىسى ءۇشىن قۋانىپ, قولداپ جۇرەمىز», دەدى شقو اكىمى دانيال احمەتوۆ.
كەزدەسۋ بارىسىندا ەسترادا ءانشىسى جاقىندا اباي قۇنانباي ۇلىنىڭ 175 جىلدىعىنا وراي قورىتىندى كونتسەرت وتكىزدى. ءانشى سەمەي قالاسىندا مەرەيتوي اياسىندا اتقارىلعان جۇمىستاردىڭ اۋقىمىن جوعارى باعالاپ, ۇلى اقىن – ابايدىڭ قازاق ءۇشىن الار ورنى زور ەكەنىن ەرەكشە اتاپ ءوتتى.
«جىل سايىن ءوزىمنىڭ گاسترولدىك ساپارىمدى شىعىس قازاقستاننان باستاۋعا تىرىسامىن. سەبەبى, تۋعان ولكەمنەن ەرەكشە شابىت, كۇش-قۋات الامىن. حالقىما جۇرەكپەن ءان شىرقاپ, ءبىر تولقىندا ونەر كورسەتەمىن. بۇگىنگى ماراپات ءۇشىن حالقىما زور العىسىمدى بىلدىرەمىن», دەدى روزا قۋانىشقىزى.
سونداي-اق, روزا رىمباەۆا الداعى جىلى ەرەكشە باعدارلامامەن كەلىپ, وبلىس تۇرعىندارىنا جەكە كونتسەرت قوياتىنىن جەتكىزدى. جوسپار بويىنشا كەش شقو سيمفونيالىق جانە حالىق اسپاپتار وركەسترىنىڭ سۇيەمەلدەۋىمەن وتەدى.