وتكەن اپتادا ۇلىبريتانيادا COVID-19 ۆيرۋسىنىڭ جاڭا شتاممى انىقتالۋىمەن دۇنيە ءدۇبىلىپ جاتقاندا, وسى ەلدەن ونىڭ تاعى ءبىر ءتۇرى تابىلدى. بۇل جولى ونى وڭتۇستىك افريكا ەلىنەن كەلدى دەگەن بولجام ايتىلۋدا, دەپ حابارلايدى Egemen.kz
بىرىككەن كورولدىكتىڭ دەنساۋلىق ساقتاۋ باسشىسى مەتت حەنكوكتىڭ مالىمدەۋىنە قاراعاندا كوروناۆيرۋستىڭ بۇل جاڭا شتاممى ەكى ازاماتتان تابىلعان جانە ول ارالعا سىرتتان, وڭتۇستىك افريكادان كەلگەن. ول ەكەۋى دە قازىر بريتاندىق دارىگەرلەردىڭ ءجىتى باقىلاۋىندا دەگەن مينيستر وڭتۇستىك افريكادان ەلگە ازىرگە ادام كىرگىزىلمەيتىنىن جەتكىزگەن. ارالعا تەك بىرىككەن كورلدىكتىڭ ءوز ازاماتتارى مەن وسى ەلگە تۇرۋعا رۇقساتى بار ادامدار عانا قايتىپ كىرە الادى. سوڭعى ەكى اپتانىڭ جۇزىندە ول ەلگە بارىپ قايتقان نەمەسە سول جاقتان كەلگەن ازامات بولسا, تەز ارادا وزدەرىن وقشاۋلاۋ قاجەتتىگى تاپسىرىلعان. ءمينيستردىڭ ايتۋىنشا «پورتون-داۋنداعى» زەرتحانا جاڭا شتامدى زەرتتەپ, ونىڭ العاشقى قورتىندىلارى شىققانعا دەيىن ۇكىمەت وسىنداي قادامدار جاساۋدى دۇرىس دەپ سانايدى.
پاندەميا ونسىز دا الەمدى ۋىسىندا ۇستاپ تۇرعان ۋاقىتتا بۇرىنعىدان دا جىلدامىراق جۇعاتىن ۆيرۋستىڭ جاڭا شتاممى دەگەن حابار كارى قۇرلىق جۇرتىن الاڭداتىپ تاستادى. ىلە-شالا ەۋروپا مەملەكەتتەرى «ەسىك-تەرەزەلەرىن قىمتاپ, ەتەك-جەڭدەرىن جيىپ» دەگەندەي ۇلىبريتانياعا بارىس-كەلىستەردىڭ توقتايتىنىن ايتا باستاعاندا فرانتسيا پرەزيدەنتى ەممانۋەل ماكرون گەرمانيا كانتسلەرى انگەلا مەركەلمەن جانە ەۋروكوميسسيا باسشىسى ۋرسۋلا فون دەر ليايەنمەن, ەۋروكەڭەس توراعاسى شارل ميشەلمەن تەلەفون ارقىلى سويلەسىپ, ەو اۋماعى بويىنشا ۇلىبريتانيامەن اراداعى بارلىق جولاۋشى, جۇك تاسىمالدارىن ۋاقىتشا توقتاتا تۇرۋدا مۇشە-ەلدەردىڭ بارلىعىنا بىردەي ورتاق قيمىل جاساۋ جايىندا اقىلداستى. قازىرگى ۋاقىتتا ۇلىبريتايامەن اۋە قاتىناسىن توقتاتپاعان ەو عا مۇشە ەل جوق, ءتىپتى سوناۋ الىستاعى ءۇندىستان, كانادا, تۇركيا, ارگەنتينا, يرانمەن قاتار رەسەي دە ۋاقىتشا اۋە بايلانىسىن ءۇزدى. وسىلايشا 35 مەملەكەت جاڭا شتامم شىققان تۇماندى البيونعا اياق باسپاي وتىر.
كارى قۇرلىقتاعى جاڭا شتاممنىڭ حابارى باسىلماي جاتىپ مالايزيادان دا جايسىز اقپارات تارادى. ەلدىڭ دەنساۋلىق ساقتاۋ ءمينيسترى نۇر حيشام ابدۋللا سارسەنبى كۇنى ساباح شتاتىنان الىنعان 60 تالدامادان COVID-19-دىڭ جاڭا موديفيكاتسياسى تابىلعانىن, ونى A701V دەپ تاڭبالاپ وتىرعاندى جەتكىزدى.
ال وڭتۇستىك افريكادان ەۋروپاعا جەتكەن شتاممعا B1.351 نەمەسە 501Y.V2 دەگەن اتاۋ بەرىلگەن, ول العاش رەت نەلسون ماندەلا اتىنداعى شىعاناقتا جۇرگىزىلگەن تالداما بارىسىندا قازان ايىندا انىقتالعان ەكەن. قازىرگى كەزەڭدە بريتاندىق عالىمدارمەن قاتار وڭتۇستىك افريكا ەلىنىڭ عالىمدارى دا ۆيرۋس ءتۇرىنىڭ قانشالىقتى جىلدام تاراۋى مەن ونىڭ ءوتۋ بارىسى جايىندا زەرتتەۋلەر جۇرگىزۋدە.
ازىرگە جاڭا شتاممدار تۋرالى كەسىپ-ءپىشىپ وي ايتۋعا بولمايدى, ولاردىڭ ۆاكتسيناعا قاتىستى دا قانداي ارەكەتى بولاتىنى بەلگىسىز دەيدى زەرتتەۋشىلەر. بىراق ءبىر ايتارلىعى, ۆيرۋس جىلدامىراق جۇققانىمەن ونىڭ اۋىرلىعى بۇرىنعىلاردان باسەڭدەۋ ءتارىزدى. جاڭا شتامم تۇرىنەن كوز جۇمۋ فاكتىلەرى تىركەلمەگەن.