قازاقستاننىڭ ءتورت وبلىسىندا قاتتى ايازعا بايلانىستى دابىلدى ەسكەرتۋ جاريالاندى, دەپ حابارلايدى Egemen.kz. بۇل تۋرالى توتەنشە جاعدايلار مينيسترلىگى حابارلادى.
قازگيدرومەت مالىمەتىنە سايكەس, 25 جەلتوقساندا سولتۇستىك قازاقستان وبلىسىندا اۋا تەمپەراتۋراسى 20-25 گرادۋسقا دەيىن كۇرت تومەندەيدى, وبلىستىڭ سولتۇگىندە 30 گرادۋس اياز بولادى.
ال كەلەسى كۇنى تۇندە 25-30, كەي جەرلەردە 33 گرادۋس اياز بولادى.
26 جەلتوقسان كۇنى پاۆلودار وبلىسىندا اۋا تەمپەراتۋراسى 30-35 گرادۋسقا دەيىن كۇرت تومەندەيدى, وبلىستىڭ سولتۇستىگىندە 38 گرادۋس اياز بولادى.
ەرتەسىندە تۇنگى ۋاقىتتا 32-37, كەي جەرلەردە 40 گرادۋس قاتتى اياز بولجانىپ وتىر.
سول سياقتى اقمولا وبلىسىندا 26 جەلتوقساندا اۋا تەمپەراتۋراسى 20-25 گرادۋسقا دەيىن كۇرت تومەندەيدى, وبلىستىڭ سولتۇستىگىندە 30 گرادۋس اياز بولادى.
27 جەلتوقساندا تۇندە 25-30, كەي جەرلەردە 35 گرادۋس اياز بولادى.
شىعىس قازاقستان وبلىسىندا سەنبى كۇنى اۋا تەمپەراتۋراسى 30-35 گرادۋسقا دەيىن كۇرت تومەندەيدى, اياز بولادى. 27 جەلتوقساندا 37-42 گرادۋس قاتتى اياز كوتەرىلەدى دەگەن بولجام جاسالدى.
قۇتقارۋشىلار اۋا تەمپەراتۋراسى قاتتى تومەندەگەن كەزدە دالاعا شىقپاۋعا, بالالاردىڭ كوشەدە جۇرۋىنە جول بەرمەۋگە كەڭەس بەردى.
بۇدان بولەك, ماماندار ايازدى كۇنى دالاعا قولعاپسىز, باس كيىمسىز جانە شارفسىز شىقپاۋ قاجەت ەكەنىن ايتتى. مەتالدان, سونىڭ ىشىندە التىن مەن كۇمىستەن جاسالعان اشەكەيلەردى تاقپاعان دۇرىس. سۋ جانە سۋىق وتكىزبەيتىن, ءىشى جىلى بيالاي كيگەن ءجون. تابيعي ماتەريالدان تىگىلگەن قولعاپتار ىڭعايلى بولسا دا, ايازدان ساقتامايدى. بەت پەن يەكتى شارفپەن قورعاۋعا بولادى.
ايازدا مەتاللدان (سونىڭ ىشىندە التىن, كۇمىس) جاسالعان اشەكەيلەردى تاقپاڭىزدار. بىرىنشىدەن, مەتالل تەز سۋىق تارتادى, سالدارنان تەرىگە جابىسىپ, ادام جاراقات الۋى مۇمكىن. ەكىنشىدەن, ساۋساقتاعى ساقينالار قالىپتى قان اينالىمىن تەجەيدى.