نۇر-سۇلتاندا جاڭا جىلدىق فلەشموب باستالدى. جاڭا جىلعا قاراي ەلوردادا قالا تۇرعىندارى بىرىگىپ, التى مەترلىك ەكو-شىرشا توقيتىن بولادى.
«كارانتين شەكتەۋلەرى مەن وقشاۋلاۋ قول قۋسىرىپ وتىرۋعا سەبەپ ەمەس. ۇيدە وتىرىپ, شىعارماشىلىقپەن اينالىسا الاسىز, ءومىر بويى ارمانداعان نارسەنى ۇيرەنە الاسىز. توقىلعان جىلى شىرشا ادامداردى بىرىكتىرەدى – جاڭا جىلدىق اتموسفەرانى تۋدىرىپ, 2021 جىلدى جۇمىلا قارسى الۋعا مۇمكىندىك بەرەدى», - دەپ اتاپ ءوتتى اكتسيا ۇيىمداستىرۋشىسى, الەۋمەتتىك كاسىپكەر راحيما مۇقىشەۆا.
«بيىل بىزگە نۇر-سۇلتان قالالىق اكىمدىك قولداۋ كورسەتتى. ءبىز توقىما ءجىپ ساتىپ الدىق. دەمەۋشىلەر دە پايدا بولادى. بۇل جولى اكتسياعا پەتروپاۆل, اتىراۋ جانە تاراز قوسىلدى. بۇكىل قازاقستان ءبىزدىڭ شىرشانى جۇمىلا توقىپ جاتىر. سونىمەن قاتار, مەكتەپتەر دە قاتىسادى. ءبىز قازىر "قولداۋ" قوعامدىق بىرلەستىگىمەن جۇمىس ىستەپ جاتىرمىز, ولار قازىردىڭ وزىندە مەكتەپتەرگە شەبەرلىك سىنىپتارىن ۇيىمداستىرىپ جاتىر»,- دەدى راحيما مۇقىشەۆا.
جاڭا جىلعا ارنالعان ەرەكشە شىرشانىڭ «بولشەكتەرىن» جاساۋعا بارلىعى قاتىسا الادى. كۇن سايىن 19-25 جەلتوقسان كۇندەرى ساعات 10:00-دەن 15:00-گە دەيىن «بايتەرەك» مونۋمەنتىنىڭ ىشىندە بارلىق سانيتارلىق نورمالاردى ساقتاي وتىرىپ, توقۋدان شەبەرلىك سىنىپتارى وتكىزىلەدى.
«قۇراق كورپە ستيلىندەگى ەكو-شىرشا» جوباسى داعدارىس كەزەڭىندەگى وزەكتى ماسەلەلەردى شەشۋگە كومەكتەسەدى. ولاردىڭ ءبىرى – جاستاردى, اسىرەسە از قامتىلعان, جۇمىسسىز, مۇگەدەك جانە الەۋمەتتىك وسال توپتاردىڭ باسقا دا ساناتتارىنداعى جاستاردى وقۋعا, قوسىمشا تابىس الۋعا, ۇيدەن جۇمىس ىستەۋگە, شاعىن ءوندىرىستى جانە كرەاتيۆتى ەكونوميكانى دامىتۋعا ىنتالاندىرۋ. سونىمەن قاتار, توقۋ جۇمىستارى پايدالى دەمالىس سىيلاپ, سترەسس پەن دەپرەسسيانى جەڭىلدەتۋگە كومەكتەسەدى.توقىما جىپتەن جاسالعان جاڭا ونەر تۋىندىسىنىڭ بيىكتىگى - التى مەتر. توقىما اشەكەيلەردى جاساۋعا مەكتەپ وقۋشىلارى مەن ولاردىڭ اتا-انالارى, قارتتار ءۇيىنىڭ زەينەتكەرلەرى, بالالار ۇيلەرى, قوعامدىق قورلار قاتىسادى. شىرشانى بەزەندىرۋگە ارنالعان زاتتار دا 20/20 سانتيمەتر ءتۇرلى-ءتۇستى توقىلعان كۆادراتتاردان جاسالعان.
جوبا اياسىندا توقىلعان جاپسىرمالاردى ەڭ كوپ توقىعان رەكورد يەسى انىقتالاتىن بولادى. سونداي-اق قۇندى سىيلىقتار مەن لوتەرەيا ويناتىلادى. لوتەرەياعا قاتىسۋ ءۇشىن ءتورت كۆادراتتان بايلاۋ كەرەك. بارلىق ەلەمەنتتەر "قۇراق كورپە" ءداستۇرلى قازاق تەحنيكاسى بويىنشا بىرىكتىرىلەدى.
فلەشموبتى نۇر-سۇلتان قالاسى اكىمدىگىنىڭ قولداۋىمەن «پۋت ماستەرستۆا» قوعامدىق قورى مەن «بەرگەن» الەۋمەتتىك شەبەرحاناسى ۇيىمداستىردى. جوبا «رۋحاني جاڭعىرۋ» ۇلتتىق باعدارلاماسى اياسىندا قازاقستانداعى ەرىكتىلەر جىلىنا وراي ۇيىمداستىرىلدى.