ءبىرىنشى ورتا سالماقتا كۇش سىناسىپ جۇرگەن قازاقستاندىق كاسىپقوي بوكسشى سادريددين احمەدوۆ 30 قاڭتاردا مەكسيكانىڭ كۋەرناۆاكا قالاسىندا وتەتىن بوكس كەشىندە ونەر كورسەتەدى, - دەپ حابارلايدى Egemen.kz
جەرلەسىمىز نيدەرلاندتىق ستيۆەن دانومەن جۇدىرىقتاسادى. 31 جاستاعى قىزعالداقتار ەلىنىڭ وكىلى وسى كۇنگە دەيىن 23 مارتە رينگكە كوتەرىلىپ, 17 رەت جەڭىس تويىن تويلادى. التى قارسىلاسىن ول نوكاۋتپەن ۇتتى. ءۇش كەزدەسۋدە ۇتىلىپ, تاعى ءۇش باسەكەدە تەڭ ەسەپ تىركەلدى. وسىدان ءۇش جىل بۇرىن انگليانىڭ ساۋتگەمپتون قالاسىندا ۇيىمداستىرىلعان جارىستا دانو قازاقستاندىق الەكساندر جۋراۆسكيمەن كەزدەسىپ, ۇپاي سانىمەن باسىم تۇسكەن ەدى.
ال 22 جاستاعى سادريددين احمەدوۆتىڭ WBC نۇسقاسى بويىنشا جاستار اراسىنداعى الەم چەمپيونى دەگەن اتاعى بار. كاسىپقويلار اراسىندا 11 جەكپە-جەك وتكىزگەن ول بارلىعىندا جەڭىسكە جەتىپ, 10 قارسىلاسىن ەسىنەن تاندىردى. بۇل باسەكەدە WBA Continental تۇجىرىمىنىڭ التىن بەلبەۋى ساراپقا سالىنادى.