16-18 جەلتوقسانى ارالىعىندا بوسنيا جانە گەرتسەگوۆينادا قر تاۋەلسىزدىگى كۇنىنە ارنالعان ءىس-شارالار ءوتتى, دەپ حابارلايدى Egemen.kz ءسىم سىلتەمە جاساپ.
بەلگىلى بوسنيالىق ءمۇسىنشى, بوسنيا مەن گەرتسەگوۆينا جوعارى قولدانبالى ونەر مەكتەبىنىڭ پروفەسسورى ستيەپو گاۆريچ جاساعان قازاقتىڭ ۇلى اقىنى جانە ويشىلى ابايدىڭ ءبيۋستى «ساراەۆو ەسكى قالاسى» تاريحي اۋدانىندا ورناتىلدى.
ەسكەرتكىش مەلياتسكا وزەنىنىڭ جاعاسىندا, ساۋلەت ونەرىنىڭ شەدەۆرلەرىنىڭ ورتاسىندا – 1891 جىلعى مەريا, XVI عاسىرداعى حادجيا مەشىتى, ۇلتتىق كىتاپحانا جانە بوسنيا استاناسىنىڭ باسقا دا كورىكتى جەرلەرىنىڭ قاسىندا ورنالاسقان.
ساراەۆوداعى مادەني اكتسيا اياسىندا, ابايدىڭ تاڭدامالى شىعارمالار جيناعىنىڭ, سونداي-اق جاقىپبەك التاەۆتىڭ ء«ال-فارابي - شىعىستان شىققان ۇلى ويشىل» كىتابىنىڭ تۇساۋكەسەرى العاش رەت قر قۇرمەتتى كونسۋلدىعى مەن «بۇركىت» ىسكەرلىك ىنتىماقتاستىق قاۋىمداستىعىنىڭ كومەگىمەن بوسنيا تىلىنە اۋدارىلىپ باسىلدى.
«ساراەۆو ەسكى قالاسى» مۋنيتسيپاليتەتىنىڭ مەرى يبراگيم حادجيبايريچپەن كەزدەسۋ بارىسىندا قازاقستان ەلشىسى تولەجان بارلىباەۆ قالا بيلىگىنە ونىڭ تۋعانىنا 175 جىل تولۋىنا وراي اباي ءبيۋستىنىڭ ورناتىلۋىنا ىقپال ەتكەنى ءۇشىن زور ريزاشىلىعىن ءبىلدىرىپ, قازاق اقىنى مەن ويشىلىنىڭ الەمدىك رۋحاني جانە مادەني مۇراعا قوسقان زور ۇلەسىن اتاپ ءوتتى.
ساراەۆو ەسكى قالاسىندا 2021 جىلى قازاق مادەني ورتالىعىن اشۋ تۋرالى ۋاعدالاستىققا قول جەتكىزىلدى. ديپلومات سونىمەن قاتار ساراەۆودا اباي ەسكەرتكىشىن ورناتۋ يدەياسىن جۇزەگە اسىرعانى جانە ونىڭ تاڭدامالى شىعارمالارىنىڭ جيناعىن شىعارعانى ءۇشىن بوسنيا مەن گەرتسەگوۆيناداعى قر قۇرمەتتى كونسۋلى امەل ديزدارەۆيچكە جانە «بەركۋت» بوسنيا ىسكەرلىك ىنتىماقتاستىق قاۋىمداستىعىنىڭ بەلسەندىلەرىنە ەرەكشە العىسىن ءبىلدىردى.