ەلوردانىڭ ءىرى ساۋدا ورتالىقتارىنا تاۋلىك بويى جۇمىس ىستەۋگە رۇقسات بەرىلەدى. بۇل تۋرالى نۇر-سۇلتان قالاسىنىڭ اكىمى التاي كولگىنوۆ قالالىق ءماسليحات وتىرىسىندا ايتتى, دەپ حابارلايدى Egemen.kz.
ء«بىز قايتادان «قىزىل» ايماققا كىردىك. بۇل شەكتەۋ ءىس-شارالارىن ودان ارى دا قاتاڭ باقىلاۋىمىز كەرەك دەگەن ءسوز. وسى ۋاقىتقا دەيىنگى تاجىريبەمىزدى ەسكەرە وتىرىپ, بىرقاتار ءىس-شارا قابىلدايتىن بولامىز. سونىمەن قاتار جاڭا تەتىكتەر دە قولدانعان ءجون. ماسەلەن, دالىزدەردى تارىلتىپ, سۋپەرماركەتتەرگە 17-00 نەمەسە 18-00-گە دەيىن جۇمىس ىستەۋگە رۇقسات بەرۋدىڭ لوگيكاسى دۇرىس. الايدا, تاجىريبە بارلىعى دا سول ۋاقىتقا دەيىن ساۋدا جاساپ ۇلگەرۋگە تىرىساتىندىعىن كورسەتتى جانە قاربالاس تۋىندايدى», - دەدى ا.كولگىنوۆ.
بۇدان سوڭ اكىم ەلوردانىڭ باس سانيتارلىق دارىگەرىمەن جانە ساۋدا ورتالىقتارىنىڭ باسشىلارىمەن بۇل ماسەلەنى شەشۋ جولدارى تالقىلانعانىن ءسوز ەتتى.
«ەندىگى كەزەكتە اۋماعى 2 مىڭ شارشى مەتردەن اساتىن ءىرى ساۋدا ورتالىقتارى تاۋلىك بويى جۇمىس ىستەۋى ءۇشىن شەشىم قابىلدايتىن بولامىز. بۇل قالا تۇرعىندارىنىڭ ساۋدا ورتالىقتارىنا قولايلى ۋاقىتتا بارا الۋى ءۇشىن جاسالماق. بۇل جاعدايدا دالىزدەردى تارىلتپايمىز جانە قاربالاس تا بولمايدى. اسىرەسە, جاڭا جىل قارساڭىندا بارلىعى دا دۇكەنگە بارىپ, ۇيىنە قاجەتتى زاتتار, ەندى بىرەۋلەر بالالالارىنا سىيلىق العىسى كەلەدى. سوندىقتان وسى ماسەلەنى بىرلەسىپ شەشۋىمىز كەرەك», - دەدى التاي كولگىنوۆ.