اتىراۋدا پروباتسيا ەسەبىندە تۇرعان سوتتالعاندار گرانت الىپ, جەكە كاسىبىن اشىپ جاتىر, دەپ حابارلايدى Egemen.kz.
بيىل بەس سوتتالعان ازامات «باستاۋ-بيزنەس» كاسىپكەرلىك نەگىزدەرىن وقىتۋ جوباسىنىڭ كۋرسىن اياقتاپ, قازىر جەكە كاسىبىمەن اينالىسىپ ءجۇر. ال ۇرلىق, توناۋ, الاياقتىق باپتارىمەن سوتتالعان ءۇش جىگىت بيزنەس-يدەياسىن جۇزەگە اسىرۋ ماقساتىندا 555 مىڭ تەڭگەنىڭ مەملەكەتتىك گرانتىنا يە بولدى. ەندى ولار بۇل قارجىنى جەكە كاسىبىن اشۋعا جۇمساعالى وتىر.
«قازىر اتىراۋ قالالىق پروباتسيا قىزمەتىنىڭ ەسەبىندە تۇرعان تاعى ءبىر سوتتالعان ازامات كولىك جۋ ورتالىعىن اشىپ, كاسىبىن دوڭگەلەتە باستادى. ال يندەر اۋداندا سوتتالعان ءبىر ازامات فاست-فۋد دۇڭگىرشەگىن اشتى», - دەپ ءمالىم دەدى اتىراۋ وبلىسى بويىنشا قىلمىستىق-اتقارۋ جۇيەسى دەپارتامەنتىنىڭ ءباسپاسوز قىزمەتى.
پروباتسيا قىزمەتىنىڭ ماماندارى سوتتالعاندار اراسىندا جەكە بيزنەستى اشۋعا, ولارعا الەۋمەتتىك-قۇقىقتىق كومەكتەر كورسەتۋگە ارنالعان سەمينار-ترەنينگتەردى وتكىزىپ جاتىر.