پاترۋلدىك پوليتسەيلەر كەشە, 2 جەلتوقساندا ساعات 02:30 شاماسىندا ماس كۇيدە كولىك جۇرگىزگەن شەتەلدىكتى ۇستادى, دەپ حابارلايدى Egemen.kz.
«اتىراۋ قالاسىنداعى گاگارين-تايمانوۆ كوشەلەرىنىڭ قيىلىسىندا «ۆاز-2104» اۆتوكولىگىن توقتاتتى. تەكسەرۋ كەزىندە كولىك جۇرگىزۋشىسى وزبەكستان رەسپۋبليكاسىنىڭ 32 جاستاعى ازاماتىنىڭ ماساڭ كۇيدە ەكەنى بايقالدى. ساراپتاما قورىتىندىسىمەن جۇرگىزۋشىنىڭ الكوگولدىك ىشىمدىك ىشكەنى انىقتالدى. جۇرگىزۋشىگە قاتىستى قر اكىمشىلىك قۇقىقبۇزۋشىلىق تۋرالى كودەكسىنىڭ 608-بابىمەن (كولىك قۇرالىن الكوگولدىك ماساڭ كۇيدە باسقارۋى) اكىمشىلىك حاتتاما تولتىرىلدى. مامانداندىرىلعان اكىمشىلىك سوتتىڭ شەشىمىمەن ماساڭ كۇيدە رۋلگە وتىرعان شەتەلدىك جۇرگىزۋشى 7 جىلعا كولىك باسقارۋ قۇقىعىنان ايىرىلىپ, 15 تاۋلىككە قاماۋعا الىندى» دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى.
اكىمشىلىك قاماۋدان شىققان سوڭ شەشىم قابىلداۋ ءۇشىن شەتەل ازاماتىنا قاتىستى قۇجاتتار كوشى-قون پوليتسياسى بولىمىنە جولدانادى.