ءماجىلىس توراعاسى نۇرلان نىعماتۋلين ۇجىمدىق قاۋىپسىزدىك تۋرالى شارت ۇيىمى (ۇقشۇ) پارلامەنتتىك اسسامبلەياسىنىڭ وتىرىسىندا ءسوز سويلەدى. بەينەكونفەرەنتسيا فورماتىندا كەڭەس وتىرىسى جانە ۇقشۇ پا ون ءۇشىنشى پلەنارلىق وتىرىسى ءوتتى, دەپ حابارلادى ءماجىلىستىڭ ءباسپاسوز قىزمەتى.
وتىرىستاردا رەسەي فەدەراتسياسىنىڭ ۇقشۇ-عا 2020 جىلى توراعالىق ەتۋ باسىمدىقتارىن ىسكە اسىرۋ جونىندەگى جۇمىستىڭ قورىتىندىلارى, سونداي-اق ۇقشۇ-نىڭ جاۋاپكەرشىلىك ايماعىنداعى جاعداي جانە ۇجىمدىق قاۋىپسىزدىككە تونەتىن قاۋىپ-قاتەرلەرگە قارسى ءىس-قيمىل جونىندەگى شارالار تۋرالى ايتىلدى.
سونىمەن قاتار پارلامەنت وكىلدەرى جاپپاي قىرىپ-جويۋ قارۋىنىڭ زاڭسىز اينالىمىنا قارسى ءىس-قيمىل, جاڭا پسيحوبەلسەندى زاتتاردى مەملەكەتتىك تىركەۋگە قاتىستى ۇقشۇ مەملەكەتتەرىنىڭ ورتاق تاسىلدەرىن قالىپتاستىرۋ, سونداي-اق قارۋلى كۇشتەردىڭ, باسقا دا اسكەرلەر مەن اسكەري قۇرالىمداردىڭ اۆياتسياسىنىڭ حالىقارالىق ۇشۋلارىن ۇيىمداستىرۋ سالاسىنداعى زاڭنامانى جەتىلدىرۋ جونىندە ۇسىنىمدار قابىلدادى.
وتىرىسقا قاتىسۋشىلار ۇقشۇ پارلامەنتتىك اسسامبلەياسىنىڭ ۇيىمعا مۇشە مەملەكەتتەردىڭ ۇلتتىق زاڭناماسىن جاقىنداستىرۋ جانە ۇيلەستىرۋ جونىندەگى 2021-2025 جىلدارعا ارنالعان قىزمەت باعدارلاماسىن, سونداي-اق ۇقشۇ پا-نىڭ 2021 جىلعا ارنالعان جۇمىس جوسپارىن بەكىتتى.
ءماجىلىس توراعاسى اتاپ وتكەندەي, قۇجاتتار اسسامبلەيانىڭ نورماتيۆتىك-قۇقىقتىق بازاسىن تەرەڭدەتۋ ءۇشىن تاقىرىپتار مەن باعىتتار كەڭىنەن قامتىلىپ, بۇگىنگى كۇننىڭ شىنايىلىعىن ەسكەرە وتىرىپ, ەگجەي-تەگجەيلى پىسىقتالعان.
سونداي-اق كەلەسى بەس جىلعا ارنالعان باعدارلامادا اۋقىمدى دەرەكتەردى قالىپتاستىرۋ جانە پايدالانۋ جونىندەگى ۇلتتىق زاڭنامانى دامىتۋ, اقپاراتتىق قاۋىپسىزدىكتى قامتاماسىز ەتۋدە جاساندى ينتەللەكت, كيبەرقاۋىپسىزدىك, تسيفرلى قولتاڭبالار جاساۋ ماسەلەلەرىنە قاتىستى مودەلدىك اكتىلەر بار.
وتىرىستارعا ارمەنيا, بەلارۋس, قازاقستان, قىرعىزستان, رەسەي جانە تاجىكستاننىڭ پارلامەنت جانە پالاتالارىنىڭ باسشىلارى, سونداي-اق اۋعانستان مەن سەربيا ۇقشۇ پا باقىلاۋشى رەتىندە قاتىستى.