بۇعان دەيىن ءتورت اۋداندا «اشىق اكىمدىك» اشىلعان ەدى. ەندى وسىنداي بەسىنشى «اشىق اكىمدىك» كەڭسەسى قىزىلقوعا اۋدانىندا اشىلدى, دەپ حابارلايدى Egemen.kz.
سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى ايدوس مامىتتىڭ ايتۋىنا قاراعاندا, «اشىق اكىمدىك» – Open space رەجيمىندە جۇمىس ىستەيتىن ارنايى جوبا.
«مەملەكەت باسشىسىنىڭ تاپسىرماسى – مەملەكەتتىك قىزمەتتىڭ ساپاسىن جاقسارتىپ, حالىقتىڭ تسيفرلى ساۋاتتىلىعىن ارتتىرۋ. سونداي-اق, سىبايلاس جەمقورلىققا جول بەرمەۋ ماقساتىن كوزدەيتىن بۇل جوبا اۋدان تۇرعىندارىنا قولايلى بولادى. سول سەبەپتەن, «اشىق اكىمدىك» مەملەكەتتىك قىزمەت كورسەتەتىن مەكەمەلەردى ءبىر جەرگە شوعىرلاندىرىپ, ازاماتتارعا قولايلى جاعداي جاساۋمەن ەرەكشەلەنەدى. جوبا ەڭ اۋەلى تۇرعىندار يگىلىگىنە قىزمەت ەتۋدى كوزدەيدى. جەرگىلىكتى اتقارۋشى بيلىكتىڭ وكىلدەرى تۇرعىندارعا قاجەتتى قىزمەت تۇرلەرىن ءبىر جەردەن كورسەتەدى. بۇدان بىلاي ۋاقىتى تىعىز, جۇمىسى قاۋىرت جاندار ءار ءبولىمدى ىزدەپ, كەز-كەلگەننىڭ تابالدىرىعىن توزدىرمايدى» دەيدى ايدوس مامىت.