الماتىدا بىلتىردان بەرى داستۇرگە اينالعان «قازاقستان مۇعالىمى – 2020» ۇلتتىق سىيلىعىنىڭ ماراپاتتاۋ ءراسىمى سالتاناتپەن اتالىپ ءوتتى. جەڭىمپاز جۇزدەن جۇيرىك شىققان, فينالدىق كەزەڭگە وتكەن ون لاۋرەاتتىڭ ىشىنەن انىقتالدى.
ەلىمىزدىڭ تۇكپىر-تۇكپىرىنەن جيىلعان وندىقتىڭ اراسىنان استانالىق «نازارباەۆ زياتكەرلىك مەكتەبى» (نزم) فيليالىنىڭ حيميا ءپانى مۇعالىمى دينارا بەيسەمباەۆا ۇزدىك شىقتى. جەڭىمپاز ءاليا نۇرسۇلتانقىزى تاعايىنداعان 4 ملن تەڭگەلىك قارجىلاي جۇلدەگە يە بولدى. بىرنەشە عىلىمي ماقالالار مەن ەڭبەكتەردىڭ اۆتورى, ەكولوگيا ماگيسترى دينارا توقتارقىزى جەڭىستەن دامەلى بولعانىن, بىراق ءالى دە سەنە الماي تۇرعانىن ايتىپ اعىنان جارىلدى.
– بۇل كونكۋرس مۇعالىمدەردىڭ قۇندىلىقتارىن دامىتۋعا, وزەكتى جانە جاڭاشىل مۇعالىمدەردى تاربيەلەۋگە سەپتىگىن تيگىزەدى. ۇيىمداستىرۋشىلارعا ۇلكەن راحمەت! سايىسقا قاتىسۋ, ۇزدىكتەر قاتارىنا ەنىپ, جەڭىمپاز اتانۋ – مەن ءۇشىن ۇلكەن مارتەبە. ارينە وسىنداي جەتىستىككە جەتۋ ءۇشىن ماڭداي تەرىمدى توگىپ ەڭبەك ەتتىم دەسەم بولادى. وقۋ بىتىرگەننەن باستاپ قازىرگە دەيىنگى كەزەڭىمدى شولىپ, ساراپتادىم. قازىر ءوزىم ءۇشىن قاي تۇستى جەتىلدىرۋ كەرەك, نە نارسەگە باسىمدىق بەرۋ كەرەك دەگەن سياقتى جاڭا جوسپار جاساپ جاتىرمىن. كونكۋرستا جەڭىمپاز بولۋ ودان سايىن ىنتامدى ارتتىرا تۇسەدى, – دەيدى د.بەيسەمباەۆا.
دينارادان بولەك تاعى توعىز ۇزدىك پەداگوگ فينالدىق كەزەڭگە وتكەن. ولار – قاراعاندى قالاسىنداعى №27 ورتا مەكتەبىنىڭ باستاۋىش سىنىپتار مۇعالىمى ولگا كيم; تاراز قالاسىنداعى دارىندى ەر بالالارعا ارنالعان ء«بىلىم يننوۆاتسيا» مامانداندىرىلعان ليتسەي-ينتەرناتىنىڭ فيزيكا ءپانى مۇعالىمى ەرجان ءجۇمادىلوۆ; الماتى وبلىسىنان كەلگەن باستاۋىش سىنىپ مۇعالىمى الما ماحانوۆا; پەتروپاۆل قالاسىنداعى «نزم» فيزيكا ءپانى مۇعالىمى دينا قۇداباەۆا; نۇر-سۇلتان قالاسىنداعى NURORDA مەكتەپ-ليتسەيى فيزيكا ءپانى مۇعالىمى ارنۇر قازىبەكوۆ; سەمەي قالاسىنداعى №3 جالپى ورتا ءبىلىم بەرۋ مەكتەپ-كەشەنىندە ورىس ءتىلى جانە ادەبيەت مۇعالىمى مەيرامگۇل جاناسپاەۆا; تەمىرتاۋ قالاسىنداعى №16 جالپى ورتا ءبىلىم بەرۋ مەكتەبىندە ەكولوگيا جانە ءوزىن-ءوزى تانۋ ءپانى مۇعالىمى ەلەنا ۆارگانوۆا; پاۆلودار قالاسىنداعى №16 مەكتەبىندە ەكولوگيا جانە ءوزىن-ءوزى تانۋ ءپانى مۇعالىمى جانار جاقسىلىقوۆا جانە ەلورداداعى «رەسپۋبليكالىق فيزيكا-ماتەماتيكا مەكتەبىنىڭ» ماتەماتيكا ءپانى مۇعالىمى گۇلنار جاقىپوۆا. وسى 10 لاۋرەات قازاقستاننىڭ اتىنان جۇلدە قورى 1 ملن اقش دوللارىن قۇرايتىن «الەم مۇعالىمى-2021» جاھاندىق سىيلىعىنا (Global Teacher Prize-2021) نوميناتسيالانادى. ولاردىڭ قاتارىندا جەڭىمپاز د.بەيسەمباەۆا دا بار.
قوعامدىق ماڭىزى بار باستامالاردى دامىتۋ قورى 2019 جىلى «Global Teacher Prize» جاھاندىق سىيلىعىنىڭ رەسمي وكىلى اتانىپ, «قازاقستان مۇعالىمى» ۇلتتىق سىيلىعىن جاريالاعان ەدى. بايقاۋدىڭ باستى ماقساتى – ۇزدىك مۇعالىمدەردى انىقتاپ, سىيلىق بەرۋمەن قاتار, ەلىمىزدەگى ۇستاز مارتەبەسىن ارتتىرۋ.
ء«بىلىم ارقىلى ادامداردىڭ ءومىرىن وزگەرتۋ» – بۇل جىل سايىن دۇنيەجۇزىلىك ءبىلىم جانە داعدى فورۋمىن (Global Education and Skills Forum) وتكىزەتىن ۆاركە قورىنىڭ ۇرانى. وسى ءىس-شارا بارشا الەمنەن كەلگەن مەملەكەت جانە قوعام قايراتكەرلەرى, بيزنەسمەندەر, مۇعالىمدەر, فيلانتروپتار باس قوساتىن ءبىلىم سالاسىنداعى ىنتىماقتاستىق پەن ماسەلەلەردى شەشۋدىڭ نەگىزگى الاڭىنا اينالدى. 2020 جىلى ۇلتتىق سىيلىق ۇمىتكەرلەرىنىڭ ساۋالدامالارى 1 مامىردان 1 قازانعا دەيىن قابىلداندى. داۋىس بەرۋدىڭ ەكى كەزەڭىنىڭ قورىتىندىسى بويىنشا 2021 جىلى قازاقستاننىڭ اتىنان «الەم مۇعالىمى» جاھاندىق سىيلىعىنا جولداما الاتىن 10 قاتىسۋشى انىقتالدى» دەيدى ۇيىمداستىرۋشىلار.
سايىس جاھاندىق سىيلىقتىڭ ۇيىمداستىرۋشىلارى Varkey قورىنىڭ بەكىتكەن ولشەمدەرى اياسىندا وتكىزىلدى. ۇمىتكەرلەردى ىرىكتەۋ مەن باعالاۋ ۇدەرىستەرىنىڭ اشىقتىعىن «PricewaterhouseCoopers» حالىقارالىق اۋديتورلىق كومپانياسى تىكەلەي باقىلاعان.
اباي ايماعامبەت,
«Egemen Qazaqstan»
الماتى