ساپار بارىسىندا پرەزيدەنت قاراعاندىداعى فەرروقورىتپا زاۋىتىندا بولىپ, بولات, شويىن قورىتۋ كەزىندە مەتاللداردىڭ مەحانيكالىق جانە كورروزيالىق توزىمدىلىگىن جاقسارتۋ ءۇشىن قولدانىلاتىن جوعارى ساپالى فەرروسيليتسيا (FeSi75) وندىرىسىمەن تانىستى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ..
بۇگىنگى كۇندە تابىستى جۇمىس ىستەپ تۇرعان زاۋىتتا مەملەكەت باسشىسىنا ءوندىرىس پروتسەسى مەن وندىرىستە, قۇرىلىستا, كەمە, اۋە كولىكتەرىن جانە اۆتوموبيل جاساۋدا قولدانىلاتىن دايىن ونىمدەر كورسەتىلدى.
كاسىپورىننىڭ اكتسيونەرلەرى ە.نىعماتۋلين, ا.كەمەرتەليدزە جانە ج.اپپاز اتالعان جوبانىڭ جەرگىلىكتى جانە جاھاندىق سۇرانىستى قامتاماسىز ەتەتىنىن ايتتى. اتاپ ايتقاندا, مۇندا وندىرىلگەن فەرروسيليتسيا قازاقستاننان بولەك, ەۋروپا, وڭتۇستىك شىعىس ازيا, سولتۇستىك جانە وڭتۇستىك امەريكا ەلدەرىنىڭ نارىعىنا شىعارىلادى.
اتالعان زاۋىتتىڭ قۋاتتىلىعى جىلىنا 180 مىڭ توننا ءونىم وندىرۋگە جەتەدى. وندا قولدانىلاتىن تەحنولوگيا فەرروسيليتسيا مەن فەررومارگانەتس وندىرۋگە مۇمكىندىك بەرەدى. جوباداعى وتاندىق ءونىمنىڭ ۇلەسى 95 پايىزدان اسادى.
قاسىم-جومارت توقاەۆ ءوندىرىستى باسقارۋ ورتالىعىن ارالاپ كورىپ, «Qaz Qarbon» جشس-ءنىڭ جاڭا جوباسىمەن تانىستى.
– بۇل وتە قاجەتتى جانە جاقسى جوبا. قۇتتى بولسىن. قازاقستاندى يندۋستريالاندىرۋعا قوماقتى ۇلەس قوسقانىن ايتپاعاننىڭ وزىندە, ەل ەكونوميكاسىنىڭ ماڭىزدى اكتيۆى سانالادى. ءوندىرىستى جىلدام كورىپ شىقتىق. بىراق بۇعان قاتىستى ۇلكەن جوسپارلارىمىز بار. باقىلاپ, كومەكتەسىپ وتىرامىز, – دەدى مەملەكەت باسشىسى.
كاسىپورىننىڭ ءونىمى ساپاسى جاعىنان ەڭ جوعارى الەمدىك تالاپقا ساي كەلەدى. پاندەميا كەزىندە كومپانيا ءونىمنىڭ ساتىلۋ اۋماعىن 15 ەلگە ارتتىرىپ, قازاقستاننىڭ ەكسپورتتىق الەۋەتىن كوتەرۋگە ۇلەس قوستى. قازىرگى تاڭدا زاۋىت ءوز ءونىمىن الەمنىڭ 37 ەلىنە ەكسپورتتايدى.
كومپانيا COVID-19 پاندەمياسىنىڭ ءبىرىنشى تولقىنى كەزىندە جۇمىس كەستەسىن ۆاحتالىق ادىسكە كوشىرىپ, بارلىق قاجەتتى جاعداي جاساعانىنىڭ ارقاسىندا قازىرگى ءوندىرىس كولەمىن ساقتاپ قالدى.
كاسىپورىن جۇمىسىنا ريزاشىلىق بىلدىرگەن پرەزيدەنت ەڭبەك ۇجىمىنا تابىس تىلەدى.