حاكىم اباي قۇنانباي ۇلىنىڭ شىعارمالارىن ساۋد ارابياسىندا كەڭىنەن ناسيحاتتاۋ اياسىندا رياد قالاسىندا قازاقستان ەلشىلىگى مەن ساۋدتىق زەرتتەۋ جانە مادەنيەتارالىق ءبىلىم ورتالىعى بىرلەسە وتىرىپ, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قولداۋىمەن ارنايى سيمپوزيۋم ۇيىمداستىردى.
ءىس-شارا اشىلۋىندا ءسوز سويلەگەن ەلشى بەرىك ارىن اباي قۇنانباي ۇلىنىڭ 175 جىلدىعىنا وراي اقىننىڭ مۇراسىن دارىپتەۋ جانە الەمگە پاش ەتۋ ماقساتىندا ەلىمىزدە جانە شەت ەلدەردە وتكەن ماڭىزدى حالىقارالىق ءىس-شارالار تۋرالى كەڭىنەن بايانداپ بەردى. وسى ايتۋلى داتاعا وراي قر تۇڭعىش پرەزيدەنتى – ەلباسى نۇرسۇلتان نازارباەۆ «اباي اماناتى» جانە مەملەكەت باسشىسى قاسىم-جومارت توقاەۆ «اباي جانە ءححى عاسىرداعى قازاقستان» اتتى اۋقىمدى ماقالالارىندا وي بولەسكەنى تۋرالى ايتىپ, ولاردىڭ قىسقاشا مازمۇنىمەن تانىستىردى.
ءوز كەزەگىندە ساۋدتىق زەرتتەۋ جانە مادەنيەتارالىق ءبىلىم ورتالىعىنىڭ جەتەكشىسى دوكتور ياحيا ماحمۋد بەن دجۋنايد بۇل يگى ءىس-شارا ابايدىڭ شىعارمالارىمەن ساۋد حالقىن كەڭىنەن تانىستىرۋ تۇرعىسىندا ماڭىزدى باستاما بولعاندىعىن ەرەكشە اتاپ ءوتىپ, مۇنداي شارالار ەكى ەل حالىقتارىن جاقىنداستىرۋعا, مادەني بايلانىستارىن نىعايتۋعا وڭ سەرپىن بەرەتىنىنە سەنىم ءبىلدىردى.
عىلىمي-زەرتتەۋ ءبولىمىنىڭ باسشىسى دوكتور ايەد مۇحامماد ءال-رابيا ساۋد ارابياسى مەن قازاقستان اراسىنداعى مادەني بايلانىستار تۋرالى بايانداما جاسادى. ال دوكتور ءامين سۋلەيمان سيدو ورتا ازيا ەلدەرىنەن شىققان ءال-فارابي, يبن سينا جانە ت.ب. عۇلامالاردىڭ يسلام وركەنيەتىنە قوسقان وراسان ۇلەسىنە توقتالىپ ءوتىپ, اقىن ابايدىڭ شىعارماشىلىعىنداعى فيلوسوفيالىق ويلار مەن كوركەم ءسوز شەبەرلىگى تۋرالى ءوز ويىمەن ءبولىستى. مادەنيەت ءبولىمىنىڭ جەتەكشىسى سالەح زامانان ابايدىڭ اراب تىلىندە «قارا سوزدەن» ءۇزىندىنى مانەرلەپ وقىپ, قاتىسۋشىلاردىڭ زور ىقىلىسىنا بولەندى.
سونىمەن قاتار, قازاقستاندىق تاراپتان ءىس-شاراعا بەينە بايلانىس ارقىلى قاتىسقان ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ شىعىستانۋ كافەدراسىنىڭ پروفەسسورى, فيلولوگيا عىلىمدارىنىڭ دوكتورى سامال تولەۋباەۆانىڭ ابايدىڭ شىعىس پەن باتىس مادەني جەتىستىكتەرىن, ايگىلى الەم ويشىلدارىنىڭ ەڭبەكتەرىن قازاق دالاسىنا تانىستىرۋداعى ەڭبەگى توڭىرەگىندە, سونداي-اق پروفەسسور سەرىك نەگيموۆتىڭ حاكىمنىڭ اقىن شىعارمالارىنداعى يسلام ءدىنىنىڭ الاتىن ورنى تۋرالى جاساعان باياندامالارى ساۋدتىق زيالى قاۋىم تاراپىنان ۇلكەن قىزىعۋشىلىق تۋدىردى.
ءىس-شارا سوڭىندا قاتىسۋشىلار اباي قۇنانباي ۇلىنىڭ 175 جىلدىق مەرەيتويىنا وراي كۇيشى ايبەك بەكبوسىننىڭ ارنايى شىعارعان «تەلقارا» كۇيىنىڭ جانە ۇلتتىق تەاتر ارتىستەرىنىڭ ورىنداۋىنداعى «كوزىمنىڭ قاراسى» ولەڭىنىڭ بەينە كليپتەرىن تاماشالادى.