اقتوبە, الماتى, شىعىس قازاقستان, جامبىل, باتىس قازاقستان, قاراعاندى, قوستاناي, قىزىلوردا, سونداي-اق پاۆلودار وبلىستارىنىڭ جانە الماتى مەن شىمكەنت قالالارىنىڭ اكىمدىكتەرى قىسقى كەزەڭدە كوممۋنالدىق-تۇرمىستىق سەكتوردىڭ ۇزدىكسىز جۇمىسىن قامتاماسىز ەتۋ ءۇشىن كومىر جەتكىزۋدى اياقتادى.
2020-2021 جىلدارداعى كەزەڭدە كوممۋنالدىق-تۇرمىستىق جانە حالىقتىڭ قاجەتتىلىگىن قاناعاتتاندىرۋ ءۇشىن جوسپارعا سايكەس, تۇتىنۋ كولەمى شامامەن 10 ملن توننانى قۇرايدى. ونىڭ ىشىندە كوممۋنالدىق-تۇرمىستىق سەكتورعا شامامەن 2,8 ملن توننا, سول سەكىلدى حالىققا 7,2 ملن توننا باعىتتالماق. 17 قاراشاداعى جاعداي بويىنشا كومىر قورىمەن قامتاماسىز ەتىلۋ دەڭگەيى – 87%.
بىلتىر جىلىتۋ ماۋسىمىنىڭ ۇقساس كەزەڭىندە قاتتى وتىنمەن قامتىلۋ كورسەتكىشى كوممۋنالدىق-تۇرمىستىق سەكتوردا 83,5%-دى, الەۋمەتتىك سەكتوردا 81,1%-دى قۇراعان ەدى.
اكىمدىكتەردىڭ اقپاراتىنا سۇيەنسەك, وڭىرلەردەگى كومىردىڭ باعاسى حالىققا تونناسىنا 6 مىڭ تەڭگەدەن باستاپ, 19 مىڭ تەڭگەگە دەيىن بەلگىلەنگەن.
كەنىشتەگى باعا تونناسىنا 2800 تەڭگەدەن 8200 تەڭگەنىڭ ارالىعىندا جانە كومىر ءوندىرۋ تەحنولوگياسىنا بايلانىستى. ەلدىڭ ەنەرگەتيكالىق جانە ونەركاسىپتىك كاسىپورىندارىنا كومىر تىكەلەي كەلىسىمشارت ارقىلى جانە شيكىزات وشاقتارىنداعى بوساتۋ باعاسى بويىنشا جىبەرىلەدى.
ەلىمىزدىڭ ەنەرگيا ءوندىرۋشى كاسىپورىندارىنا 47,3 ملن توننا كومىر تيەلسە, ونەركاسىپ كاسىپورىندارىنا 4,7 ملن توننا كومىر جىبەرىلدى. بۇل 2019 جىلدىڭ سايكەس كەزەڭىنەن 2% - عا ارتىق. 23,7 ملن توننا كومىر ەكسپورتتالدى.