شىمكەنتتە "شىمكەنت – تمد مادەني استاناسى 2020" جىلىنىڭ سالتاناتتى جابىلۋ ءراسىمى اياسىندا ۇيىمداستىرىلعان ءىس-شارا اباي ساياباعىنداعى پوەزيا جانە ادەبيەت بۇرىشى كورمەسىنەن باستاۋ الدى, دەپ حابارلايدى Egemen.kz.
كىتاپ كورمەسىنە قالاداعى 5 كىتاپحانا (37 بولىمشەلەرى) وڭىرلىك اقىن-جازۋشىلاردىڭ تۋىندىلارى قويىلدى. شاراعا كەلۋشىلەردى اسەم انمەن كۇتىپ العان اجەلەر كەشتىڭ شىرايىن اشتى.
مەرەكەلىك شارا "Piano Performance" ياعني, ورىس دراما تەاترى الدىندا ءتۇرلى-ءتۇستى بوياۋلارعا بويالعان پيانينودان جاندى دىبىستا شىرقالعان مۋزىكامەن جالعاستى. مۇنداي كۇي ساندىق قالانىڭ 5 جەرىنە قويىلعان. ەرەكشەلىگى كۇي ساندىقتا ويناي الاتىن كەز-كەلگەن قالا تۇرعىنى ءوزى قالاعان مۋزىكاسىن ويناپ, كەلۋشىلەردىڭ ىقىلاسىنا بولەنۋگە مۇمكىندىك بار.
بۇگىنگى دۋماندى كەش اربات الاڭىنداعى تەاترلاندىرىلعان قويىلىمدار مەن تسيرك ارتىستەرىنىڭ ونەرىمەن جالعاستى. جيىلعان قاۋىم "قىز جىبەك", ء"بىرجان -سارا", "ايمان-شولپان", "سايرام بازارى" قويىلىمدارىنان ۇزىندىلەر تاماشالادى.
مادەني استانانىڭ جابىلۋىنا وراي وتەتىن مەرەكەلىك شارا بايدىبەك بي الاڭىندا قولونەر شەبەرلەرىنىڭ كورمەسىمەن جالعاستى.
ايتا كەتەيىك, بۇگىنگى ۇيىمداستىرىلعان شارا كارانتين تالابىن ساقتاي وتىرىپ, بارلىق كەلۋشىلەرگە ساقتىق جونىندە ەسكەرتپەلەر ءجيى ەسكەرتىلىپ وتىردى.