شۆەتسيانىڭ ريكسداگىندا ورتالىق ازيا پارلامەنتتەرىمەن دوستىق قاۋىمداستىعى العاش رەت قۇرىلدى, دەپ حابارلايدى Egemen.kz.
شۆەد ساياساتكەرلەرىنىڭ بۇل ماڭىزدى قادامى وسى ەڭ ءىرى سكانديناۆيا ەلى مەن كەڭ بايتاق ورتالىق ازيا ايماعى اراسىندا كوپ قىرلى قاتىناستاردى نىعايتۋعا جاعداي جاسايتىن سۇحبات ءۇشىن كەڭىستىكتى قۇرۋعا باعىتتالعان. پارلامەنتاريلەر الدىندا تۇرعان بۇل جانە باسقا دا ماڭىزدى مىندەتتەر تۋرالى قاۋىمداستىقتىڭ توراعاسى حاننا ۆەستەرين ريكسداگتىڭ بىرقاتار دەپۋتاتتارىنىڭ, سونىڭ ىشىندە ريكسداگتىڭ ءبىرىنشى ۆيتسە-سپيكەرى وسا ليندەستامنىڭ قاتىسۋىمەن ونلاين راسىمىندە ايتتى. وسى توپقا كەڭ سپەكترلى ماسەلەلەرمەن اينالىساتىن ءارتۇرلى ساياسي پارتيا وكىلدەرىنىڭ كىرەتىنى نازار اۋدارتادى.
قاۋىمداستىقتىڭ العاشقى قۇرىلتاي وتىرىسىنا قازاقستاننىڭ شۆەتسياداعى ەلشىسى قايرات ءابدىراحمانوۆ شاقىرىلدى. ول وتىرىستىڭ قاتىسۋشىلارىن ورتالىق ازيادا قالىپتاسقان دوستىق پەن كورشىلىك قاتىناستارمەن, ايماقتىڭ ۇلكەن ەكونوميكالىق الەۋەتىمەن, قازاقستان مەن شۆەتسيا اراسىنداعى ءداستۇرلى تىعىز ىنتىماقتاستىقتىڭ جاعدايىمەن جانە بولاشاعىمەن, سونداي-اق قازاقستان قوعامىنداعى رەفورما ۇدەرىستەرىمەن تانىستىردى.
شۆەتسيا پارلامەنتاريلەرى الداعى قازاقستانداعى پارلامەنت پەن قىرعىزستانداعى پرەزيدەنت سايلاۋىنا ەرەكشە مۇددەلىلىك تانىتتى. قاۋىمداستىقتىڭ مۇشەلەرى ورتالىق ازياداعى حالىقارالىق قاتىناستار مەن گەوساياساتتىڭ باسقا دا وزەكتى ماسەلەلەرى بويىنشا پىكىر الماستى.
قاۋىمداستىق قۇرىلۋىنىڭ ۋاقىتىلىعىنا ەرەكشە كوڭىل اۋدارىلدى, ونىڭ قىزمەتى پارلامەنتتەر اراسىندا دا, شۆەتسيا مەن ورتالىق ازيا حالىقتارى اراسىندا دا تىعىز جانە تۇراقتى قاتىناستاردى نىعايتۋ ءۇشىن تىرەك بولادى. تاراپتاردىڭ ءوزارا ءىس-قيمىلى تۇراقتى الەۋمەتتىك-ەكونوميكالىق جانە دەموكراتيالىق دامۋدىڭ وزىق تاجىريبەسىمەن الماسۋعا, مادەني بايۋعا, ينۆەستيتسيالاردى تارتۋ مەن ساۋدانىڭ دامۋىنا جاعداي جاسايتىن بولادى.