العا اۋدانى سارىقوبدا اۋىلدىق وكرۋگىنە قاراستى بولگاركا ەلدى مەكەنىنە گاز قۇبىرى جۇرگىزىلىپ, 500 تۇرعىنى بار اۋىل كومىر جاعۋ مەن كۇل شىعارۋدىڭ ازابىنان قۇتىلدى. بولگاركاعا كورشىلەس جاتقان سارىقوبدا ەلدى مەكەنىنىڭ تۇرعىندارى دا ءبىراز كۇندە كوگىلدىر وتىننىڭ قىزۋىن سەزىنەتىن بولادى.
«اقتوبە – شۇبارقۇدىق» تاس جولىنىڭ بويىندا ورنالاسقان بولگاركا اۋىلىنىڭ تۇرعىندارى مال باعىپ, باۋ-باقشا, بيداي, ارپا ەگۋمەن اينالىسىپ كەلەدى. بىرەر جىل بۇرىن اۋىلعا ورتالىقتاندىرىلعان اۋىز سۋ جۇرگىزىلدى, ينتەرنەت بايلانىسى دا جاقسى. ءبىر كەمشىلىگى – تۇرعىندار سانىنىڭ ازدىعى. ءومىر سۇرۋگە قولايلى مۇمكىندىك تۋسا, بولگاركا مەن سارىقوبدا ەلدى مەكەندەرىنە كوشىپ كەلۋشىلەر قاتارى كوبەيە تۇسەدى دەگەن پىكىردە اۋىل اقساقالدارى. دەگەنمەن, جىل سايىن 4-5 وتباسى بولگاركاعا كوشىپ كەلىپ, ءۇي سالىپ, شارۋاشىلىقپەن اينالىسىپ جاتىر.
– كەڭەستىك كەزەڭدە كومىر جاققان اۋىلدارعا گاز قۇبىرلارى تارتىلىپ, جاقسى جولدار سالىنۋى – تۇرعىنداردىڭ يگىلىگى ءۇشىن جاسالىنعان تاۋەلسىزدىكتىڭ جەمىستەرى. وزدەرىڭىز بايقاپ وتىرعانداي, قازىرگى كەزدە بارلىق اۋىلداردىڭ اجارى كىرىپ جاتىر. العا اۋدانىندا گاز بارماعان ەكى-ءۇش اۋىل عانا قالدى. راس, اۋىل تۇرعىندارى تالاي قيىندىقتى باستان كەشىردى. نارىق قىسىمىنا شىداي الماي, كوپتەگەن جۇمىس ورىندارى جابىلىپ قالدى. سوعان قاراماستان, سىزدەر اۋىلدا تۇرىپ, سابىرلىلىق تانىتتىڭىزدار. شىدادىڭىزدار. كۇتتىڭىزدەر. سىزدەردىڭ اۋىلدا مال ۇستاپ, كاسىپتىڭ كوزىن تاۋىپ وتىرعان ەڭبەكتەرىڭىزدى ءتۇسىنىپ, ۇمىتتەرىڭىزدى اقتاۋ ءۇشىن قىزمەت ەتەتىن بولامىز, – دەدى بولگاركا تۇرعىندارىن كوگىلدىر وتىن قۋانىشىمەن قۇتتىقتاپ كەلگەن وبلىس اكىمى وڭداسىن ورازالين.
اۋىل اقساقالى امانگەلدى تىرناقوۆ ريزاشىلىعىن ءبىلدىردى. بولگاركا اۋىلىنىڭ تۇرعىنى مارينا مارينوۆا دا وت جاعىپ, كۇل شىعارۋدىڭ بەينەتىنەن قۇتىلعانىنا وتە قۋانىشتى.
– 59 جىلدان بەرى اۋىلدا تۇرىپ كەلەمىز. وسى جەردە ءوسىپ-وربىدىك. بۇرىن وتىنعا مالدىڭ تەزەگىن جيناپ, قىستا كومىر جاعاتىنبىز. كومىر ساتىپ الۋعا جىل سايىن 150 مىڭ تەڭگە جۇمسايتىنبىز. ەندى وتىنعا دەگەن شىعىنىمىز ازايادى, ويتكەنى اي سايىن گاز ءۇشىن تولەيتىن اقى كومىردىڭ قۇنىنان ارزانعا تۇسەدى, – دەيدى ول.
سارىقوبدا اۋىلىنىڭ تۇرعىندارى دا قۇبىر تارتۋ جۇمىستارىن اياقتاپ, اۋىلىشىلىك گاز جەلىلەرىن ورناتىپ جاتقان مەردىگەرلەردى اسىقتىرىپ وتىر. وسىلايشا بيىلعى جىلدىڭ سوڭىندا بولگاركا مەن سارىقوبدانى قوسقاندا, العا اۋدانىنداعى بارلىق ەلدى مەكەندەردىڭ كوگىلدىر وتىنمەن قامتىلۋى 97 پايىزعا جەتتى.
اقتوبە وبلىسى,
العا اۋدانى