قىزىلوردالىق كاسىپكەرلەردىڭ ۇسىنىسى وڭ شەشىلمەك

كەزدەسۋگە كاسىپكەرلەر پالاتاسى وڭىرلىك كەڭەسىنىڭ توراعاسى قايرات بورانباەۆ, پالاتا باسشىلىعى, قالا اكىمىنىڭ ورىنباسارى بەكتاس نۇريدينوۆ پەن قالالىق سانيتارلىق-ەپيدەميولوگيالىق باقىلاۋ باسقارماسى باسشىسىنىڭ مىندەتىن اتقارۋشى گۇلميرا سىزدىقوۆا, مەيرامحانا سالاسىندا كاسىپ جۇرگىزۋشى بيزنەس يەلەرى قاتىستى.

وڭىرلىك كەڭەس توراعاسى قايرات بورانباەۆ قازىر بيزنەستىڭ قاي ءتۇرى دە قيىندىقتى باستان وتكىزىپ جاتقاندىعىن ايتا كەلىپ, اسىرەسە قوعامدىق تاماقتانۋ سالاسىنداعى كاسىپكەرلەردىڭ تىعىرىققا تىرەلگەندىگىن جەتكىزدى. ناۋرىز ايىنان بەرى جۇمىسىن توقتاتقان مەيرامحانا يەلەرى ءۇشىن كوممۋنالدىق شىعىندار دا اجەپتەۋىر سالماق, ونىڭ ۇستىنە ارقايسىسىنىڭ تولەيتىن نەسيەسى تاعى بار.

كاسىپكەرلەردىڭ ايتۋىنشا, ماسەلە وبلىستىڭ باس سانيتارىنىڭ 2 قاراشادا قابىلداعان قاۋلىسىنان تۋىنداۋدا. كارانتين تالاپتارى جەڭىلدەتىلگەن تۇستا كافەلەرگە 23.00-گە دەيىن جۇمىس جاساۋعا مۇمكىندىك بەرگەن. ال كەيىنگى قاۋلىدا كەرىسىنشە جۇمىس جاساۋ مەرزىمى قىسقارىپ وتىر. 

"ايماقتا ەپيدەميالىق جاعداي ۋشىعىپ تۇرسا بۇل قادامدى تۇسىنەر ەدىك. الايدا, شۇكىر, وبلىس قازىر جاسىل ايماقتا. وسىعان سايكەس, جۇمىس جاساۋ مەرزىمىنىڭ رەسپۋبليكالىق قاۋلىدا كورسەتىلگەن مەرزىمدە قالعانىن قالايمىز", دەيدى كاسىپكەر اقمارال ابدىرازاقوۆا.

مۇنان وزگە, سالا كاسىپكەرلەرى مونيتورينگتىك توپقا قاتىستى دا ۇسىنىستارىن ورتاعا سالدى.

قوعامدىق تاماقتانۋ سالاسىندا جۇمىس جاسايتىن كاسىپكەرلەر سانيتارلىق تالاپتاردى قاتاڭ ساقتاۋعا وزدەرى دە مۇددەلى ەكەندىكتەرىن جەتكىزىپ وتىر. تەك تالاپتار ناقتى, انىق بولعانىن قالايدى.

سونىمەن كەزدەسۋ بارىسىندا كاسىپكەرلەر اكىمدىك وكىلدەرىنە نەگىزگى ءۇش تالاپتارىن جەتكىزدى. ءبىرىنشىسى, قوعامدىق تاماقتانۋ سالاسىنىڭ جۇمىس جاساۋ ۋاقىتىن ەڭ بولماعاندا 23.00-گە دەيىن ۇزارتۋ. ەكىنشىسى, مونيتورينگتىك توپ مۇشەلەرىندە توپ مۇشەسى ەكەندىگىن دالەلدەيتىن قۇجاتتاردىڭ بولۋى. ءۇشىنشىسى, جان-جاقتان جەكە ۇيالى تەلەفوندارعا تۇسىرمەۋ.

كەزدەسۋ قورىتىندىسىمەن قالا اكىمىنىڭ ورىنباسارى بەكتاس نۇريدينوۆ جۇمىس ۋاقىتى مەن مونورينگتىك توپ جۇمىسىنا قاتىستى ۇسىنىس كوميسسيادا قارالاتىندىعىن جەتكىزدى. مۇنان وزگە, كاسىپكەرلەردىڭ ۇسىنىستارىنىڭ بارلىعى وبلىستىق شتابتا قايتا قارالاتىن بولدى. ناتيجەسى بويىنشا ءتيىستى قاۋلى قابىلدانادى دەپ كۇتىلۋدە.

ايتا كەتۋ كەرەك, 17 قاراشا كۇنى رەسپۋبليكالىق ۆەدومستۆوارالىق كوميسسيانىڭ وتىرىسى ءوتتى. وتىرىستا "اتامەكەننىڭ" بۇعان دەيىن كاسىپكەرلەرگە قىزمەتىنە قاتىستى بەرگەن بىرقاتار ۇسىنىستارى قولداۋ تاپتى. كوميسسيا وتىرىسىنىڭ قورىتىندىسى بويىنشا قابىلدانعان شەشىمدە كارانتين تالاپتارىنا قاتىستى بىرقاتار جەڭىلدىكتەر قاراستىرىلدى.