قوستاناي وبلىسى پوليتسيا دەپارتامەنتىنىڭ ءباسپاسوز قىزمەتى قالاداعى "وڭتۇستىك" پوليتسيا بولىمىنە 63 جاستاعى قالا تۇرعىنى پاتەرىنەن 7200 دوللار جانە 2800 ەۋرو كولەمىندەگى قوماقتى اقشانىڭ ۇرلانعانىن مالىمدەدى, دەپ حابارلايدى Egemen.kz
شاعىمدانۋشى ەلەنا ەسىمدى ءۇي كۇتۋشىسىنەن كۇدىكتەنەتىنىن دە ايتادى. جابىرلەنۋشىنىڭ سوزىنشە, بەيتانىس كەلىنشەكتى بيىل كۇزدەن باستاپ پاتەرىن تازالاتۋ ءۇشىن ايىنا ءبىر-ەكى رەت جالداعان.
جەدەل ىزدەستىرۋ ءىس-شارالارى بارىسىندا وڭتۇستىك پوليتسيا ءبولىمىنىڭ قىزمەتكەرلەرى قوستاناي قالاسىنىڭ بۇرىن سوتتالماعان 47 جاستاعى تۇرعىنىن ۇستادى.
ۇرى ءوز قىلمىسىن مويىنداپ, اقشانىڭ ءبىراز بولىگىن يەسىنە قايتارىپ بەرگەن. كۇدىكتى اقشانىڭ ءبىر بولىگىن جۇمساپ, تۋىستارىنىڭ نەسيەسىن تولەپ, ءبىر بولىگىن بانككە دەپوزيتكە سالىپ ۇلگەرگەن.
اتالعان فاكتى بويىنشا قىلمىستىق كودەكستىڭ 188-بابى 3-بولىگى بويىنشا تىركەلگەن سوتقا دەيىنگى تەرگەۋ امالدارى جۇرگىزىلۋدە.